Türkmenistanyň Milli çempionatynda tamamlanyp barýan möwsümiň 24-nji tapgyrynda 17 gol hasaba alyndy. Iki duşuşykda ýer eýeleri ýeňiş gazanyp, olar uly hasap bilen üstün çykmagy başardy. Sanawyň lideri “Altyn asyr” öz meýdançasynda “Şagadamy” 4-1 hasabynda ýeňlişe sezewar etdi. Duşuşykda Altymyrat Annadurdyýew 3 gol geçirip, toparynyň ýeňiş gazanmagyna uly goşant goşdy. Altymyrat Annadurdyýewyň şu möwsümde çempionatyň çäginde derwezä uran gollarynyň sany 30-a ýetdi.
Tapgyryň iň köp golly oýnunda “Aşgabat” topary öz meýdançasynda iň aşaky orunda barýan “Energetik” toparyny 6-1 hasabynda ýeňdi. 1-nji ýarymda 1 gol geçiren “Aşgabat” toparynyň gollaryny Daýanç Nuryýew (32 p), Şatlyk Gurbanow (56), Myrat Amantaganow (61, 63 p), Nurýagdy Muhammedow (65) hem-de Orazberdi Myradow (69) derwezä girizdi. “Energetik” toparynyň ýeke-täk pökgüsini 78-nji minutda Alikper Musaibow öz adyna ýazdyrdy. 3-nji ýer ugrunda ýiti göreş alyp barýan Köpetdag myhmançylykda Nebitçini 3-1 utdy. Myhmanlaryň gollary Ýazgylyç Gurbanow, Şiri Annaýew hem-de Yhlas Saparmämmedow tora saldy. 55-nji minutda meýdançada 1 oýunçy kem galan “Nebitçiniň” ýeke goluny- 32-nji minutda Alibek Abdurahmanow derwezä girizdi. Çempion bolmak mümkinçiligi matematik hasap boýunça dowam edýän “Ahal” myhmançylykda “Merwden” Gurban Annaýewiň 79-njy minutdaky goly bilen 1-0 üstün çykdy.
Şeýlelikde, 24-nji tapgyrdan soň, “Altyn asyr” 61 utuk bilen 1-nji orunda barýar. Çempionatyň tamamlanmagyna 4 tapgyr galanda aratapawudy 1 oýny kem “Ahal” bilen arasyndaky utuk aratapawudyny 12-ä çykaran “Altyn asyr” nobatdaky çempionlygynyň bosagasynda dur. Aragatnaşykçylara yzly-yzyna 7-nji çempionlygy üçin 1 utuk ýeterlik bolar. “Altyn asyr” 25-nji tapgyrda myhmançylykda “Köpetdag” bilen duşuşar.
“Aşgabat”–“Energetik”: 6–1
(Daýanç Nuryýew 32 p, Şatlyk Gurbanow 56, Myrat Amantaganow 61, 63 p, Nurýagdy Muhammedow 65, Orazberdi Myradow 69 – Alikper Musaibow 78)
“Merw”–“Ahal”: 0–1
(Gurban Annaýew 79)
“Nebitçi”–“Köpetdag”: 1-3
(Alibek Abdurahmanow 32 – Ýazgylyç Gurbanow 24, Şiri Annaýew 56 p, Yhlas Saparmämmedow 90+4)
Myratberdi Berenow 55, ikinji duýduryş (“Nebitçi”)
“Altyn asyr”–“Şagadam”: 4-1
(Farhat Italmazow 14 ö.d., Altymyrat Annadurdyýew 69, 79 p, 88 – Yhlas Magtymow 83 p)
