Futbol boýunça Türkmenistanyň Kubogy ýaryşynda çärýek finalyň jogap oýunlary oýnaldy. 1-nji oýunda 7–0 hasabynda ýeňiş gazanan “Altyn asyr” myhmançylykda-da “Energetikden” üstün çykdy. Altymyrat Annadurdyýewiň (32), Begenç Akmämmedowyň hem-de Myrat Annaýewiň (90+4 p) gollary bilen 3–0 ýeňiş gazanan “Altyn asyr” ýarym finalda oýnamaga hukuk gazandy. Öz meýdançasynda “Merwi” 2–0 ýeňen “Köpetdag” myhmançylykda-da 1–0 utup, ýarym finala adyny ýazdyrdy. Paýtagtlylara ýeňiş getiren ýeke-täk goly 42-nji Şazada Bäşimow tora girizdi. Öz meýdançasynda 4–2 hasabynda ýeňiş gazanan “Şagadam” myhmançylykda “Nebitçi” bilen 2–2 deňme-deň oýnap, çärýek finala çykdy. Ýer eýeleri Serdaralay Ataýewiň (49) hem-de Azat Garajaýewiň (62) gollary bilen 2-0 öňe saýlanyp, özlerine gerek bolan hasaby gazansalaram, olara bu üstünligi saklamak başartmady. 76-njy minutda Aşyrgeldi Saryýewiň hem-de Merdan Gurbanowyň 11 metrlik jerime urgusyndan 90+4-nji minutda geçiren gollary bilen hasaby deňlän “Şagadam” 2 oýnuň netijesi boýunça öňe saýlanyp, ýarym finala çykdy. Tapgyryň iň çekeleşikli geçen oýnunda “Aşgabat” bilen “Ahal” toparlarynyň arasyndaky jogap duşuşygynda hasap açylmady. Ýeňijini 11 metrlik jerime urgulary kesgitläp, 4-2 üstün çykan “Ahal” ýarym finalçy boldy.
Şeýlelikde, Türkmenistanyň Kubogy ýaryşynda ýarym finalda “Ahal” bilen “Altyn asyr”, “Köpetdag” bilenem “Şagadam” toparlary özara duşuşarlar. Ýarym finalyň 1-nji oýunlary 1-nji dekabrda, jogap oýunlary-da 5-nji dekabrda oýnalar. Ýarym finalyň ýeňijileri-de 9-njy dekabrda finalda duşuşarlar.
