Angliýanyň çempionaty “Premier Ligada” 28-nji tapgyrda Mançester derbisi oýnaldy. 1-nji ýerdäki “Mançester Siti” öz meýdançasynda 2-nji basgançakdaky “Mançester Ýunaýtedi” kabul etdi. Çekeleşikli geçen oýunda myhmanlar 2-0 hasabynda ýeňşini baýram etdi. “Mankunianlara” ýeňiş getiren gollary 2-nji minutda penaltiden Bruno Fernandeş hem-de 50-nji minutda Luk Şaw derwezä girizdi. Şeýlelikde, “Mançester Ýunaýted” çempionlyga barýan bäsdeşiniň ähli ýaryşlardaky 21 oýundan bäri dowam edip gelýän ýeňişli ýörişini soňlady. Çempionatda 20 oýundan bäri ýeňiş gazanyp gelýän “Mançester Siti” şu möwsümde 3-nji gezek utuldy.
Ole Gunnar Solskaýer “Mançester Siti” bilen myhmançylykda geçiren ilkinji 3 duşuşygynda-da ýeňiş gazanan 1-nji “ýunaýtedli” tälimçi boldy. Şeýle-de, “Mançester Ýunaýted” çempionatda myhmançylykda 22 oýundan bäri ýeňilmän gelýär (14 ýeňiş, 8 deňlik).
