Ýaňy-ýakynda Russiýa Federasiýasynyň www.metaschool.ru (“МетаШкола”) saýtynda 10-15 ýaş arasyndaky ýetginjekleriň arasynda yzygiderlikde 2 günläp aýry kategoriýalarda halkara onlaýn küşt ýaryşy geçirildi. Birinji ýaryş “Bir göçümde küşt” ady bilen geçirilip, oňa dünýäden 1460-den gowrak okuwçy gatnaşdy. Olaryň 500-ine golaýy üstünlikli orunlara mynasyp bolup, hormat hatlardyr kuboklar bilen sylaglandylar. Onlaýn ýaryşa gatnaşan ildeşimiz Mary şäherindäki 25-nji orta mekdebiň 3 synp okuwçysy Wepa Begliýew hem 2-nji orna mynasyp boldy. Ol okuwyndan daşary ýöriteleşdirilen Olimpiýa ätiýaçlyk sport mekdebinde Türkmenistanyň at gazanan tälimçisi, halypa mugallym Ejegyz Ýalkanowadan tälim alyp, küştüň inçe syrlaryny öwrenýär. Her ýylda geçirilýän bu ýaryş FIDE-niň kadalaryna laýyklykda, şweýsar ulgamy boýunça geçirildi.
Ikinji gündäki ýaryş “Onlaýn küşt türgenleşigi” ady bilen geçirildi. Bu ýaryşa 80-den gowrak ýaş türgen gatnaşyp, bu gezek bolsa iki dogan ýagny, Agajan we Wepa Begliýewler 3-nji orny eýelemegi başardylar. Geçen aýda hem, Wepa Begliýew şol saýtda baýrakly ýere mynasyp bolupdy. Doganlar 7-8 ýaşlaryndan bäri küşt bilen gyzyklanyp gelýär.
Şeýle ýaryşlaryň biri aprel aýynyň 18-ine geçirildi. Bu ýaryş 6 tapgyrdan ybarat bolup, şweýsar ulgamynda guraldy. Bu çekeleşikli ýaryşa dürli ýurtlardan 90-dan gowrak ýaş küştçüler gatnaşyp, Wepa we Agajan Begliýewler 3-nji we 4-nji orunlara mynasyp boldular. Goý, şeýle zehinli ýaşlaryň sany mundan beýläk hem artsyn!
Aýşirin ALYÝEWA
Halkara ynsanperwer ylymlary we ösüş uniwersitetiniň žurnalistika hünäriniň talyby.
