AFK Kubogy ýaryşynda “F” toparçada çykyş edýän ýurdumyzyň çempiony “Altyn asyr” ilkinji duşuşygynda Täjigistanyň “Hujand” topary bilen duşuşdy. Çekeleşikli geçen oýun 2-2 hasabynda deňlikde tamamlandy. Gollaryň 4-si hem birinji ýarymda derwezä girizildi. 15-nji minutda ildeşlerimiz hasaby açyp, bu goly Altymyrat Annadurdyýew öz adyna ýazdyrdy. 18-nji minutda “Altyn asyryň” ýarymgoragçysy Berdimyrat Rejebow gyzyl kart alyp, meýdançadan çykaryldy. Ýer eýeleri 25-nji minutda Artýom Serdugyň goly bilen hasaby deňlediler. 41-nji minutda Dilşod Bozorow “Hujandy” öňe saýlady. Ýöne ruhdan düşmedik türkmen futbolçylar 3 minutdan soň ýene-de Altymyrat Annadurdyýewiň tapawutlanmagynda hasaby deňlediler. Bu duşuşykdaky soňky gol boldy. Oýnuň tamamlanmagyna 4 minut galanda 2-nji gezek sary kart alan Mekan Saparow hem gyzyl kart bilen meýdançadan çykaryldy. Şeýlelikde, çekeleşikli we dartgynly geçen oýun 2-2 hasabynda deňlikde tamamlandy.
Toparçadaky beýleki oýunda Özbegistanyň “Nasaf” topary Gyrgyz Respublikasynyň “Alaý” toparyndan 4-0 üstün çykdy.
“Altyn asyr” topary toparçadaky 2-nji duşuşygyny 17-nji maýda “Alaý” bilen geçirer (17:00).
ALTYN ASYR – HUJAND: 2-2
(Altymyrat Annadurdyýew 15, 44 – Artýom Serduk 25, Dilşod Bozorow 41)
