Germaniýanyň Bundesligasynda Bawariýa taryhy rekord goýdy. Şol sanda toparyň hüjümçisi Robert Lewandowski hem öz rekordyny täzeledi. Öz meýdançasynda Köln bilen duşuşan Bawariýa kynlyk bilen 3-2 hasabynda ýeňdi. Birinji ýarysy golsuz geçen oýnuň 50-nji minutynda Robert Lewandowski tapawutlanyp, hasaby açdy. Bundesligada yzly-yzyna 12-nji duşuşygynda tapawutlanan 33 ýaşyndaky Lewandowski bu görkeziji boýunça Borussiýa Dortdmundaky öz rekordyny gaýtalady. Yzly-yzyna 15-nji duşuşygynda tapawutlanan Lewandowski bu duşuşyklarda 23 gol geçirdi.
58-nji minutda Serž Gnabri hasaby 2-0-a çykardy. Ýöne Köln 2 minutda gol geçirip, hasaby deňledi. Gollary Modeste (60) bilen Uth (61) derwezä girizdi. 71-nji minutda Serž Gnabri oýna soňky nokady goýup, 3-2 hasabynda ýeňiş gazandy we möwsümdäki ilkinji 3 utugyna eýe boldy.
Şeýlelikde, Bawariýa yzly-yzyn 74 duşuşykda gol geçirip, bu babatda Real Madridiň 73 oýunlyk rekordyny täzeledi. Soňky gezek 2020-nji ýylyň 9-njy fewralynda Leipsig duşuşygynda gol geçirip bilmedik Bawariýa şol 74 oýunda 214 gol pökgini derwezä girizdi. Şol gollaryň 72-sini Robert Lewandowski öz adyna ýazdyrdy. Real Madrid 2016/17 möwsüminde yzly-yzyna 73 oýunda gol geçirip, şolarda 200 pökgini garşydaşlarynyň derwezesinden girizdi.
