Gawai adasynyň golaýynda bir çaga 37 ýyl ozal deňze taşlanan çüýşe tapdy. Bu çüýşäni mundan 37 ýyl ozal Ýaponiýada mekdep okuwçylary tejribe geçirmek maksady bilen deňze taşlan eken. Ýaponiýanyň “Mainichi” gazetiniň habaryna görä, Tiba prefekturasyndaky “Choshi” atly mekdebiň tebigaty öwreniş gurnagynyň okuwçylary 1984-nji ýylda ummandaky akymy öwrenmek maksady bilen taslama taýýarlapdyrlar. Taslamanyň çäklerinde okuwçylar bir çüýşäni suwa goýberipdirler. Çüýşäniň içinde ýaponça, iňlisçe we portugalça hat ýazylypdyr. Hatda bu çüýşäniň suwa goýberilen ýeri ýazylypdyr we ony tapan adamyň agzalýan mekdep bilen habarlaşmagy haýyş edilipdir.
Bu çüýşäni dokuz ýaşly Abbi Graýam atly çagajyk “Hawaiian Paradise Park” atly plýajdan tapypdyr.
Çüýşäniň tapylandygy mekdebe habar berlipdir. Şol döwürler mekdebiň tebigata goramak gurnagynyň agzasy, 54 ýaşly Maýumi Kanda bu habary eşidip, ýaşlyk ýyllaryny ýatlandygyny we haýran galandygyny aýtdy.
