Mundan ozal “Facebook”-yň adyny üýtgetjekdigi barada habary beripdik. Kompaniýanyň ýolbaşçysy Mark Zukerberg kompaniýanyň täze adynyň Meta boljakdygyny mälim etdi. Şeýle hem Zukerberg “Facebook”-yň geljek 10 ýylyň dowamynda işläp taýýarlajak “hyýaly älem”-ini (metaverse) tanyşdyrdy. “Horizon” atly bu ulgam entek ulanyjylara elýeterli bolmasa-da köp wagtdan bäri kämilleşdirilýär. Hyýaly älemi döremek üçin kompaniýa Ýewropa ýurtlarynda 10 müň inženeri işe alar. Bu taslama üçin 10 milliard dollar maýa goýum özleşdiriler. Hyýaly älem ulanyjylaryň internet arkaly elýeterli bolýan dünýä girmegine mümkinçilik berýär. Iňlis dilinde meta hem-de “universe: älem” sözlerinden emele gelen “metaverse” adalgasyny 1992-nji ýylda Nil Stiwenson orta atýar. Şol ýyl amerikan ylmy-populýar eserleriň awtory Stowensonyň “Harsaň” (Snow Crash) atly romanynda hyýaly älem suratlandyrylýar. Eserde adamlar awatarlar hökmünde bir-biri we programma üpjünçiligi agentleri bilen hakyky dünýäniň metaforasyny ulanýan üç ölçegli wirtual giňişlikde özara täsirleşýärler. Stiwenson bu adalgany internetiň hakykat esasly “mirasdüşerini” suratlandyrmak üçin ulanýar.
Zukerberg hyýaly älemi hyýaly aragatnaşykdan soňky tapgyr hökmünde görkezýär. Kompaniýanyň ýolbaşçysy tehnologiýanyň ösüşiniň adamlaryň arasyndaky gatnaşyklaryň has tebigy bolmagyna getirendigine belläp, “Facebook”-da ilki hat ýazyp bolandygyny, soňra kameraly telefonlaryň çykmagy bilen internetiň wizaul we mobil bolandygyny belleýär. Aragatnaşygyň hiliniň ýokarlanmagy bolsa, has köp wideo döretmäge mümkinçilik berdi.
“Google”-yň 2015-nji ýylda edişi ýaly “Facebook Inc.” hem adyny üýtgetdi. Zukerberg “Facebook Inc.”-a eýeçilik edýän “ýokary” kompaniýanyň adynyň “Meta” boljakdygyny aýtdy. Şeýlelikde, Zukerberg “Meta” dolandyryjylar geňeşiniň başlygy bolar. “Facebook” bolsa, “Meta” kompaniýasynyň garamagyndaky kompaniýa bolar.
Jemgyýetçilik tory hökmünde “Facebook”-yň ady üýtgedilmez.
“Google” kompaniýasy hem özüne degişli dürli ugurlarda iş alyp barýan şereketleriň sanynyň artmagy bilen ähli şereketleri, şol sanda “Google” kompaniýasyny “Alphabet” atly kompaniýanyň garamagynda jemläpdi.
Hyýaly älemiň ady: “Horizon”
“Facebook” hyýaly älemine “Horizon” adyny beripdir. “Horizon”-daky adamlar hyýaly dünýäde duşuşarlar. Bu platform iş hem-de güýmenje maksady bilen ulanylar. Şeýle hem hyýaly dünýäde oýun hem oýnap bolar. Hyýaly hakykat üçin mazmun döretjeklere 150 million dollar sarp ediler.
