Futbol dünýäsiniň iň uly baýraklarynyň biri hasaplanýan “Ballon d’Or” baýragynyň bu ýylky ýeňijisi mälim edildi. Fransuzlaryň meşhur futbol neşiri “France Football” tarapyndan gowşurylýan “Altyn top” baýragyna bu ýyl hem argentinaly Lionel Messi laýyk görüldi. 7-nji gezek bu hormata mynasyp bolan Messi 613 utuk toplap, polşaly Robert Lewandowski (580) hem-de italiýaly Žoržiniodan (460), fransiýaly Benzema (239) bilen Kanteden (186) öňe saýlandy. Lionel Messi mundan ozal 2009-njy, 2010-njy, 2011-nji, 2012-nji, 2015-nji, 2019-njy ýyllarda-da “Altyn top” baýragyny gazanypdy. Portugaliýa super ýyldyz Kristiano Ronaldo (178 utuk) bu sapar 6-njy ýeri eýeläp, soňky 11 ýylda ilkinji gezek öňdäki üçlüge girip bilmedi. Ronaldo “Altyn topy” 5 gezek gazanyp, ol 6 sapar 2-nji ýeri eýeläpdi. Soňky 30 ýylda ilkinji gezek fransuz klublarynyň futbolçysy, şol sanda PSŽ-niň futbolçysy ilkinji sapar “Altyn topa laýyk görüldi. Şeýle-de, Lionel Messi (34 ýaş 158 gün) rowaýaty derwezeçi Ýew Ýaşinden (34 ýaş 56 gün) geçip, “Altyn topy” gazanan iň ýaşuly 2-nji futbolçy boldy. Messiden öňde 42 ýaşyna golaýlanda (41 ýaş 321 gün) baýragy alan angliýaly Stenli Mattýuz bolup, ol ilkinji “Altyn top” baýragynyň eýesidir (1956-njy ýyl).
“Altyn top” baýragy geçen ýyl pandemiýa bahanasy bilen hiç kime gowşurylmandy.
