Özbegistanyň paýtagty Daşkendde dowam edýän agyr atletika boýunça 86-njy Dünýä çempionatynda ildeşlerimiziň ýene biri kiçi bürünç medala mynasyp boldy. 61 kilograma çenli agram derejesinde çykyş eden Seýitjan Mirzaýew birbada götermekde 128 kilogramy ýokary galdyrmagy başardy. 2-nji synanyşygynda 128 kilogram agramy galdyran Seýitjan Mirzaýewiň görkezen bu netijesi 3-nji orna mynasyp boldy. Ildeşimiziň itekläp götermekde geçiren 3 synanyşygy-da şowuna bolmady. Netijede, bu agram derejesinde koreýaly Şin Rok birbada götermekde 132 kg, itekläp götermekde-de 156 kg göterip, jemi 288 kg agram bilen altyn medala mynasyp boldy. Gruziýaly Şota Mişwelidze bolsa degişlilikde 131 hem-de 155 kg, jemi 286 kg agram bilen 2-nji ýeri eýeledi. Umumylykda bürünç medala 282 kg (127+155) agramy göteren Saud arabystanyly Seraj Al-Salim mynasyp boldy.
