Portugaliýanyň yzly-yzyna 2-nji çempionlygy, Russiýa 6-njy gezek finalda utuldy
Futzal boýunça Niderlandlarda geçirilen 12-nji Ýewropa çempionatynda Portugaliýanyň ýygyndysy ýeňiş gazandy. Olar finalda Russiýanyň ýygyndysy bilen duşuşdy. Amsterdamdaky Ziggo Dome Arenada oýnalan finala ruslar erjel başlady. Olar birinji ýarymda Sokolow (9:49) hem-de Afanasýewiň (12:45) gollary bilen 2-0 öňe saýlandylar. Rudan düşmedik portugallar birinji ýarym tamamlanmanka, Tomaş Pasonyň (18:39) goly bilen geçirden 2 golunyň biriniň öwezini doldy. Ikinji ýarymda başgaça oýun görkezen Portugaliýanyň ýygyndysy Andre Koelhonyň gollary (26:45, 31:16) bilen ilki hasaby deňledi, soňra-da öňe saýlandy. Oýnuň soňky sekuntlarynda-da (39:59) Pani Warela topy boş derwezä gönükdirip, hasaby 4-2-ä çykardy. Şeýlelikde, 4-2 hasabynda ýeňşini baýram eden Portugaliýanyň futzal ýygyndysy yzly-yzyna 2-nji gezek yklymyň çempiony diýen derejäni gazandy. Geçen ýyl Dünýä çempionlygyny hem gazanan Portugaliýa 2018-nji ýyldaky çempionatyň finalynda Ispaniýany goşmaça wagtda 3-2 hasabynda ýeňip, ilkinji gezek yklym ýaryşynyň çempiony bolupdylar.
2001-nji ýylda çempionlyk gazanan Russiýanyň ýygyndysy 6-njy gezek finalda utuldy. 1996-njy we 2005-nji ýyllarda Ispaniýadan utulan russiýaly futzalçylar soňky 5 çempionatyň 4-sinde finalda Ispaniýadyr (2 gezek) Italiýadan hem-de Portugaliýadan asgyn geldi.
3-nji ýer ugrundaky oýunda Ispaniýanyň ýygyndysy Ukrainany 4-1 hasabynda ýeňip, 2-nji gezek bürünç medala mynasyp boldy.
Çempionatyň iň ökde oýunçysy diýlip, portugaliýaly Ziki Te saýlandy. 7 gol geçiren gazagystanly Biržan Orazow iň köp gol geçiren futbolçy baýragyna laýyk görüldi.
