Geljek ýylda Hytaýda geçiriljek Aziýa Kubogy 2023-iň saýlama tapgyrynyň bijeleri çekildi. Bijä laýyklykda 2-nji torbadan ýaryşa goşulan Türkmenistanyň futbol milli ýygyndysy “E” toparça düşdi. Ildeşlerimiz bu toparçada Bahreýn, Malaýziýa hem-de Bangladeşiň ýygyndylary bilen bije çekişdi. 8-14-nji iýun aralygynda oýnaljak duşuşyklar Malaýziýada geçiriler. Türkmen futbolçylary ilki 8-nji iýunda Malaýziýa, 11-nji iýunda Bangladeş, 14-nji iýunda-da Bahreýn bilen duşuşar.
Bu toparça bilen bir hatarda, jemi 6 toparça bolup, her toparçada 4 ýygyndy bäsleşer. Her toparçany birinji orunda tamamlanlar Aziýa Kubogynyň final tapgyryna gatnaşar. Şeýle-de, 2-nji ýeri eýelänleriň iň gowy netije görkezen 5-si hem final tapgyryna adyny ýazdyrar.
24 ýygyndynyň gatnaşjak Aziýa Kubogy ýaryşyna ýer eýeleri Hytaýdan başga, Ýaponiýanyň, Siriýanyň, Kataryň, Günorta Koreýanyň, Awstraliýanyň, Eýranyň, BAE-niň, Saud Arabystanynyň, Yragyň, Omanyň, Wýetnamyň hem-de Liwanyň ýygyndylary 2-nji saýlama tapgyryndan soň gatnaşmaga hukuk gazanypdy. 18-nji Aziýa Kubogy geljek ýylyň 16-njy iýuny bilen 16-njy iýuly aralygynda Hytaýyň 10 şäherinde geçiriler.
3-nji saýlama tapgyrynyň toparçalary (duşuşyklar 8-14-nji iýun aralygynda oýnalar):
“A”: Iordaniýa, Kuweýt, Indoneziýa, Nepal (Kuweýtde)
“B”: Palestina, Filippinler, Ýemen, Mongoliýa (Mongoliýada)
“C”: Özbegistan, Tailand, Maldiwler, Şri Lanka (Özbegistanda)
“D”: Hindistan, Gonkong, Owganystan, Kamboja (Hindistanda)
“E”: Bahreýn, Türkmenistan, Malaýziýa, Bangladeş (Malaýziýada)
“F”: Gyrgyzystan, Täjigistan, Mýanma, Singapur (Gyrgyzystanda)
