Amerikanyň aktýorlar gildiýasy (SAG) ýylyň tapawutlananlaryny sylaglandyrdy. 28-nji gezek geçirilen baýrak gowşurylyş dabarasynda filmler ugry boýunça iň gowy aktýor diýlip, “Şa Riçard” (King Richard) filmindäki keşbi üçin Will Smit saýlandy. Iň gowy aktrisa baýragyna “Temmi Feýiň gözleri” (The Eyes of Tammy Faye) filmindäki keşbi üçin Jessika Çesteýn laýyk görüldi. Ikinji plandaky iň gowy aktýor hem-de aktrisa baýraklary degişlilikde, Ariana DeBos (“Westsaýdyň hekaýasy”, West Side Story) bilen Troý Kotsura (“CODA: ker ene-atanyň perzendi”, CODA) gowşuryldy. Troý Kotsuryň gazanan baýragy garaşylmadyk waka hökmünde hasaba alyndy. “CODA: ker ene-atanyň perzendi” filminde surata düşenler iň gowy artistler topary baýragyna mynasyp boldy. Iň gowy dublýor baýragyny “Jeýms Bond” filminiň soňkusy bolan “Ölmäge wagt ýok” (No Time To Die) filminiň dublýorlary eýeledi.
Teleýaýlym ugry boýunça tutuş dünýäde uly meşhurlyk gazanan koreýleriň “Kalamar oýunlary” (Squid Game) serialy 3 baýrak gazandy. Drama seriallarynyň iň gowy aktýory we aktrisasy baýraklaryna ady agzalan bu serialyň artistleri – degişlilikde, Li Žun-žae bilen Žun Ho-ýeon laýyk görüldi. Serial iň gowy dublýor baýragyna-da mynasyp boldy.
Komediýa seriallarynyň iň gowy aktýory Jeýson Sudeiks (“Ted Lasso”, Ted Lasso), iň gowy aktrisasy diýlibem Jin Smart (Hacks) saýlandy. Maýkl Kiton (“Syndyrma”, Dopesick) bilen Keýt Winslet (“Isttaunli Meýr”, Mare of Easttown) telefilm ýa-da gysga göwrümli seriallaryň iň gowy aktýory hem-de aktrisasy baýraklary bilen sylaglandy.
“Mirasdüşer” (Succession) serialynda keşp janlandyrýanlar drama seriallarynyň, “Ted Lasso” serialynda surata düşenler bolsa komediýa seriallarynyň iň gowy artistler topary baýragyna laýyk görüldi.
