Dünýä belli ýyldyz futbolçylaryň biri Klarens Seedoorf musulman bolandygyny habar berdi. 45 ýaşyndaky ozalky futbolçy özüniň Yslam dinine geçmeginde ýanýoldaşy Sofiýanyň täsiriniň uly bolandygyny aýtdy. Gollandiýaly ozalky futbolçy: “Men Yslam dinini saýlaýaryn. Gutlanlaryň hemmesine köp sagbolsun aýdýaryn. Maňa Yslamy tanadan we öwreden ýanýoldaşym Sofiýa-da minnetdarlygymy bildirýärin” diýdi. Musulman bolandygy üçin adyny üýtgetmekçi däldigini aýdan Seedorf karýerasy boýunça Aýaks, Real Madrid, Sampdoriýa, Inter, Milan, Botafoga ýaly meşhur klublarda çykyş etdi. Asly surinamly bolan Seedorf UEFA Çempionlar Ligasynda 3 dürli klubda çempionlyk gazanan ýeke-täk futbolçy hökmünde tanalýar. Deportiwo, Milan, Şenzen ýaly klublara-da gysga möhletlik tälim beren Seedorf Niderlandlaryň ýygyndysynda 87 oýunda 11 gol geçirdi.
