UEFA Çempionlar Ligasynda tapgyryň iň geň galdyran netijesi Italiýada hasaba alnyp, ýerli Ýuwentus öz meýdançasynda Wilýarrealdan garaşylmadyk ýagdaýda 3-0 asgyn geldi. Oýnuň soňky 12 minutynda 3 gol geçiren Wilýarrealyň adyndan Žerar Moreno (78 p), Pau Torres (85) hem-de Arnaut Danžuma (90+3 p) tapawutlandy. Umumy hasapda 4-1 öňe saýlanan Wilýarreal UÇL-däki 12-nji pleý-off duşuşygynda 3-nji ýeňşini gazandy we 4-nji sapar gatnaşýan ýaryşynda 3-nji gezek çärýek finala çykdy (2005/06, 2008/09, 2021/22). Yzly-yzyna 3-nji möwsüminde 1/8 finaldan yzyna gaýdan Ýuwentus bu ýaryşda soňky gezek 2008/09 möwsüminde öz meýdançasynda uly hasap bilen utulypdy. Topar şol möwsümde toparçalarda Bawariýadan 4-1 ýeňlipdi.
