Los Anjelesdäki Dolby teatrynda geçirilen 94-nji Oskar baýraklary ýatdan çykmajak wakalara baý boldy. Iň gowy aktýor baýragyny gazanan Will Smitiň belli aktýor Kris Rokuň ýüzüne şapbat çalmagy dabaranyň garaşylmadyk gopgunly wakasyna öwrüldi. Köpler bu wakany şouň bir bölegi hasaplady we soň bu ýagdaýyň ozal ssenarileşdirilmändigi mälim boldy. 3 sagat 40 minutlap dowam eden dabarany Emi Şumer, Rejina Holl, Wanda Snaýkes alyp bardy.
Dabarada iň gowy film diýlip, “CODA: ker ene-atanyň perzendi” (CODA) saýlandy. 3 ugur boýunça dalaşgärlige hödürlenen film olaryň ählisinde-de arzyly heýkeljige ýetmegi başardy. Filmiň edebi esasyny ýazan, şol bir wagtyň özünde režissýory hem bolan Sian Heder iň gowy adaptirlenen ssenariý baýragyna laýyk görüldi. Filmde surata düşen Troý Kotsur ikinji plandaky iň gowy aktýor baýragy bilen sylaglandy. Ol bu baýragy gazanmak bilen Ketrin Bigelow hem-de hytaýly Hloe Çžaodan soň Oskar alan 3-nji zenan režissýor hökmünde hasaba alyndy.
Iň köp ugur boýunça dalaşgär görkezilen (12 ugurdan) “Itiň güýji” filmi dabaradan bary-ýogy 1 heýkeljik bilen dolandy. Film 12 ugurda dalaşgär görkezilipdi. Ýylyň iň köp baýrakly kinolarynyň biri bolan filmiň ýeke-täk gazanan Oskary-da iň gowy režissýor ugry boldy. Filmi surata düşüren Jeýn Kampion ikinji gezek iň gowy režissýor ugry boýunça Oskara dalaşgär görkezilen ilkinji zenan režissýor hökmünde hasaba alnypdy. Ol bu baýragy gazanmak bilen Ketrin Bigelowdan soň Oskar alan 2-nji zenan režissýor hökmünde hasaba alyndy.
Iň gowy aktýor we aktrisa baýraklary Will Smit (“Şa Riçard”) bilen Jessika Çesteýne (“Temmi Feýiň gözleri”) gowşuryldy. Iki artist hem 3-nji gezekki dalaşgärliginde ilkinji Oskar baýraklaryny gazandylar.
Ikinji plandaky iň gowy aktrisa baýragyna “Westsaýdyň hekaýasy” filmindäki keşbi üçin Ariana DeBos laýyk görüldi.
Iň gowy asyl ssenariý baýragy-da “Belfast” filminiň edebi esasyny ýazan Kennet Brana gowşuryldy.
Iň gowy animasiýa hem-de iň gowy halkara film baýraklary garaşylýan ekran eserlerine berildi. Ýagny “Disney”-iň önümi bolan “Enkanto” iň gowy animasiýa, ýaponiýaly režissýor Rýusuke Hamaguçiniň dünýä belli ýazyjy Haruki Murakaminiň eseri esasynda surata düşüren “Meniň ulagymy sür” atly kinosy-da iň gowy halkara film diýlip saýlandy. Ýapon filmleri 17 gezek dalaşgär görkezilip, 5-nji gezek Oskara laýyk görüldi.
Deni Willnýowyň surata düşüren we 10 ugurda dalaşgär görkezilen “Dýun” film 6 heýkeljik bilen dabaranyň iň köp baýrakly kinosy boldy.
Iň gowy grim ugrunda ýeňiji bolan Kruella filminiň grimçisi Jenni Biwan 11-nji dalaşgärliginde 3-nji gezek Oskara laýyk görüldi. Meşhur grimçi mundan ozal 1986-njy “Gowy görnüşli otag” (A Room with a View) hem-de 2015-nji ýylda “Telbe Maks: gazap ýoly” (Mad Max: Fury Road) filmleri bilen Oskar gazanypdy.
Iň gowy film: “CODA: ker ene-atanyň perzendi” (CODA)
Iň gowy režissýor: Jeýn Kampion – “Itiň güýji” (The Power of the Dog)
Iň gowy aktýor: Will Smit – “Şa Riçard” (King Richard)
Iň gowy aktrisa: Jessika Çesteýn – “Temmi Feýiň gözleri” (The Eyes of Tammy Faye)
Ikinji plandaky iň gowy aktýor: Troý Kotsur – “CODA: ker ene-atanyň perzendi” (CODA)
Ikinji plandaky iň gowy aktrisa: Ariana DeBos – “Westsaýdyň hekaýasy” (West Side Story)
Iň gowy asyl ssenariý: “Belfast” (Belfast) – Kennet Brana
Iň gowy adaptirlenen ssenariý: “CODA: ker ene-atanyň perzendi” (CODA) – Sian Heder
Iň gowy animasiýa: “Enkanto” (Encanto)
Iň gowy dokumental film: “Tomusky soul” (Summer of Soul)
Iň gowy halkara film: Meniň ulagymy sür” (Drive My Car) – Rýusuke Hamaguçi – Ýaponiýa
Iň gowy aýdym: No Time To Die” – “Ölmegiň wagty däl” (No Time To Die) – Billi Aýliş, Finnes O’Konnel
Iň gowy saz: “Dýun” (Dune) – Hans Zimmer
Iň gow ses: “Dýun” (Dune)
Iň gowy çeperçilik bezegi: “Dýun” (Dune)
Iň gowy operator: Greýg Freýzer – “Dýun” (Dune)
Iň gowy montaž: “Dýun” (Dune)
Iň gowy wizual effektler: “Dýun” (Dune)
Iň gowy makiýaž we saç bezegi: “Temmi Feýiň gözleri” (The Eyes of Tammy Faye)
Iň gowy grim: “Kruella” (Cruella)
Iň gowy gysga metražly film: “Uzaga çeken hoşlaşyk” (The Long Goodbye)
Iň gowy gysga metražly dokumental film: “Basketbolyň şagyzy” (The Queen of Basketball)
Iň gowy gysga metražly animasiýa: “Aýna arassalaýan enjam” (The Windshield Wiper)
