Katar 2022 Dünýä Kubogynda çärýek finalda penaltileriň netijesinde Horwatiýadan 4-2 asgyn gelen Braziliýa ýene bir çempionaty medalsyz tamamlar. Ähli Dünýä Kubogy ýaryşyna gatnaşan Braziliýa 5 çempionlyk gazanyp (1958, 1962, 1970, 1994, 2002), bu ugurda rekordyň eýesidir. Olar 2 gezek 2-nji (1950, 1998), 2 gezek hem 3-nji (1938, 1978) ýeri eýeläp, jemi 9 medal gazanypdylar. Olaryň gazanan 6-njy we 7-nji medallarynyň arasynda 3 çempionat bardy. Ýöne soňky medalyny 20 ýyl mundan ozal gazanan, ýagny Aziýada geçirilen çempionatda çempion bolan Braziliýa şol bäsleşikden bäri medallaryň daşynda galýar. Başgaça aýdylanda, soňky 5 çempionaty medalsyz tamamlanan Braziliýanyň hiç haçan şeýle şowsuz döwri bolmandy. Sambaçylar soňky 5 çempionatyň 4-sinde çärýek finaldan geçip bilmediler. Olar diňe 2014-nji ýylda özlerinde geçirilen ýaryşda ýarym finala çykypdylar. Onda-da çykanlaryna müň puşman bolan Braziliýa soňlugy bilen çempionaty 4-nji orunda tamamlapdy. Mahlasy, Braziliýanyň ýygyndysynyň medalsyz döwri häzirlikçe 24 ýyl bolar we olar bu wagtyň uzamazlygy üçin 2026-njy ýyla çenli berk taýýarlyk görmeli bolarlar.
