Şu gün «Awaza» milli syýahatçylyk zolagynda Türkmenistanyň, Azerbaýjan Respublikasynyň we Türkiýe Respublikasynyň döwlet Baştutanlarynyň üçtaraplaýyn duşuşygy geçirilýär. Oňa gatnaşmak üçin düýn günüň ahyrynda Türkiýe Respublikasynyň Prezidenti Rejep Taýyp Ärdogan, şeýle-de şu gün irden Azerbaýjan Respublikasynyň Prezidenti Ilham Aliýew Türkmenistana geldiler. Doganlyk ýurtlaryň Liderleri Türkmenbaşy şäheriniň Halkara howa menzilinde ýokary derejede garşylandy.
Myhmansöýer türkmen topragynda geçirilýän üçtaraplaýyn sammit bu ýurtlaryň arasyndaky dostlukly hem-de özara bähbitli hyzmatdaşlygyň taryhynda täze tapgyry alamatlandyrýar. Hususan-da, “Türkmenistan – Azerbaýjan – Türkiýe” görnüşindäki döwlet Baştutanlarynyň birinji duşuşygy dostlukly ýurtlaryň milli ykdysadyýetleriniň strategik ugurlary bolan ulag, energetika ulgamlarynda däp bolan hyzmatdaşlygy ösdürmäge täze itergi berer. Duşuşygyň netijeleri boýunça möhüm üçtaraplaýyn resminamalaryň birnäçesine gol çekilmegine garaşylýar.
Düýn, 13-nji dekabrda «Awaza» milli syýahatçylyk zolagynda dostlukly ýurtlaryň energetika, ulag ulgamlarynyň hem-de daşary syýasat edaralarynyň ýolbaşçylarynyň derejesinde duşuşyklar geçirildi.
