Katar 2022 Dünýä Kubogynda bürünç medalyň eýesi ertirki duşuşykda belli bolar. Ertir, has takygy, şenbe güni, 17-nji dekabrda oýnaljak bürünç medal ugrundaky duşuşykda Horwatiýa bilen Marokkonyň ýygyndylary duşuşar. Ýarym finalda utulan, başgaça aýdylanda, finala çykyp bilmän lapykeç bolup galan 2 ýygyndynyň arasyndaky bu duşuşykda köplenç şol ýarym finalda az zyýan çeken topar ýeňiş gazanýar. Göwünlik beriji duşuşyk hökmünde görülýn ertirki duşuşykda faworit Horwatiýa görünýän ýaly bolsa-da, Marokkolylar atlaryny üçünjilige ýazdyrsalar, olar üçin has uly abraý bolar. Ýarym final duşuşygyndan soň Marokkonyň tälimçisi Walid Regragui bu barada: “Finala çykyp bilmedik. Ýöne 3-nji ýer eýelemek biziň üçin uly abraý bolar” diýipdi.
Duşuşyk Aşgabat wagty bilen 20:00-da başlar. Al Raýýan şäherindäki “Khalifa International” stadionynda oýnaljak duşuşyga katarly Abdulrahman Al-Jassim eminlik eder.
Iki topar şu çempionatda bir toparçada çykyş edipdi. “F” toparça wekilçilik eden 2 ýygyndynyň şol oýnunda hasap açylmandy. Olar ondan öňem ýoldaşlyk duşuşygyny geçiripdiler we şol oýun hem deňlikde tamamlanypdy.
Ýeri gelende aýtsak, 2018-nji ýylda-da Belgiýa bilen Angliýanyň ýygyndylary bir toparçada çykyş edip, soňra olar 3-nji ýer üçin geçirilen oýunda hem duşuşypdylar. Şol oýunlaryň ikisinde-de Belgiýa ýeňipdi (1-0, 2-0). 1998-nji ýylda 3-nji ýeri eýelän Horwatiýa 2-nji gezek bürünç medala ymtylýan bolsa, marokkolylar afrikalylaryň ilkinji medaly üçin meýdança çykarlar.
Marokkonyň ýygyndysy ABŞ we Günorta Koreýadan soň ýarym finala çykan Ýewropadan hem-de Günorta Amerikadan bolmadyk, ýagny başga yklymdan iň gowy dörtlüge düşen 3-nji topar bolupdy. Eger-de olar ýeňiş gazansa, onda Türkiýeden soň Dünýä Kubogynda medal gazanan 2-nji musulman, şol sanda ilkinji Afrika we arap ýurdy bolar.
