Angliýanyň “Çelsi” topary transferden doýmaýandygyny ýene bir ýola subut etdi. Gyşky transfer möwsüminiň iň soňky minutlarynda londonlylar “Benfikanyň” argentinaly ýarymgoragçysy Enzo Fernandesi 121 million ýewro transfer etdi. “Çelsiniň” portugal klubuna tölän bu mukdary “Premier Liganyň” taryhyndaky iň gymmat transfer hökmünde hasaba alyndy. “Çelsi” kluby Argentinanyň Dünýä Kubogyny gazanmagynda uly rol oýnan 22 ýaşly oýunçy bilen 2031-nji ýylyň tomsuna çenli, ýagny uzak möhletleýin şertnama baglaşdy. “Benfika” topary geçen tomusda 10+8 million ýewro transfer eden Enzo Fernandesiň transferinden gazanan 121 million ýewrosynyň 34 million ýewrosyny oýunçynyň ozalky kluby “Riwer Pleýte” berer. Enzo Fernandes “Benfikada” umumylykda 24 oýunda 4 gol geçirdi.
