UEFA Çempionlar Ligasynda 1/8 finalyň galan 4 duşuşygy-da şu gije hem-de ertir gije oýnalar. Geçiriljek 4 duşuşyk hem 01:00-da başlap, şu gün “Liwerpul” öz meýdançasynda “Real Madridi” kabul eder. Bu duşuşyk iki toparyň arasyndaky 10-njy oýun bolup, bu duşuşykda rumyniýaly Iştwan Kowaç jürlewük çalar. Iki klubuň mundan öňki 9 oýnunda “Real” 5, “Liwerpul” 3 gezek ýeňiş gazandy. Iki topar 3 gezek finalda duşuşyp, 1981-nji ýylda “Liwerpul”, 2018-nji we geçen 2022-nji ýylda “Real Madrid” ýeňiş gazanypdy.
Şeýle-de, şu gijäniň ýene bir esasy oýny “Aýntraht” bilen “Napoliniň” arasynda bolar. Iki topar 3-nji gezek gabatlaşar. Mundan öňki 2 duşuşykda Ýewropa Ligasynyň çäginde “Aýntraht” 2 oýunda-da 1-0 hasaplar bilen ýeňiş gazanypdy. Duşuşyga portugaliýaly Artur Soareş Diaş eminlik eder.
“Leipsig” – “Mançester Siti”, “Inter” – “Porto”
Ertir agşamky duşuşyklarda-da Leipsig bilen “Mançester Siti” hem-de “Inter” bilenem “Porto” duşuşar. “Leipsig”–“Mançester Siti” duşuşygyna Niderlandlardan Serdar Gözübüýük eminlik eder. Iki topar mundan ozal 2 gezek toparçalarda duşuşypdylar. Şonda “Leipsig” öz meýdançasynda 2-1, “Mançester Siti” hem Angliýada 6-3 ýeňipdi.
“Inter” bilen “Portonyň” arasyndaky duşuşyga serbiýaly Srdjan Ýowanowiç eminlik eder. Iki toparyň mundan öňki oýunlarda “Inter” 2, “Porto” 1 gezek ýeňiş gazandy. 1 oýun deňlikde gutaryp, gollarda “Inter” 6-5 öňde.
