Ýewropanyň öňdebaryjy 5 çempionatynyň biri bolan Germaniýanyň “Bundesligasynda” şu möwsümde çempionlyk ugrunda ýiti göreş dowam edýär. Soňky 10 ýyly “Bawariýanyň” çempionlygy bilen geçen çempionatda häzirki wagtda 6 klub çempionlygyň dalaşgär bolup, 3 topar 43 utuk bilen öňdeligi eýeleýär. 1-nji ýerdäki topar bilen 6-njy orundaky toparyň arasynda 5 utuk aratapawudy bolup, “Bawariýanyň” erk edýän çempionaty “Bundesligada” şeýle waka soňky ýyllarda seýrek duş gelýän hadysadyr. Şol 43 utukly toparyň biri-de “Union Berlin” bolup, paýtagtlylar öz meýdançasynda “Şalke” bilen golsuz deňme-deň oýnady we ýeke-täk lider bolmak mümkinçiligini häzirlikçe elden giderdi.
Ady telim gezek üýtgedilýär
Ozalky Gündogar Germaniýanyň topary bolan “Union Berlin” beýleki klublardan azda-kände üýtgeşik hasaplanýan topardyr. “Union Berlin” adyny alýança birnäçe gezek ady çalşylan klub 1906-njy ýylda esaslandyrylýar. Ilkinji ýyllarda “SC Union 06 Oberschöneweide” adyny alan klub Ikinji Jahan urşundan soň SC Oberschöneweide diýlip atlandyrylýar. Berlin şäheriniň iki bölünmeginden soň bolsa 1966-njy ýylda häzirki adyny alýar. Ondan öňem “Union Oberschöneweide”, “BSG Motor Oberschöneweide”, “SC Motor Berlin”, “TSC Oberschöneweide”, “TSC Berlin” atlary hem ulanylýar. Toparyň lakamy “Schlosserjungs” bolup, ol “metallurgiýaçy oglanlar” diýmekdir.
Soňky ýyllarda ozalky “Bundesligada” Gündogar Germaniýadan “Leipsig”, wagtal-wagtal “Energi Kottbus”, “Hansa Rostok”, “Dinamo Drezden” ýaly klublar wekilçilik edip, olardan diňe “Leipsig” häzir hem çempionatda çykyş edýär. Soňky 3 möwsümden bäri bolsa “Leipsigiň” hataryna “Union Berlin” hem goşulýar. “Union Berlin” 2019/20 möwsüminde “Bundesliga” çykyp, şondan bäri-de garaşylyşyndan ýokary netijeler bilen çykyş edip gelýär.
Janköýerleriň uly goldawy
Zähmetkeşleriň hem-de azapkeşleriň kluby hökmünde meşhurlyk gazanan klubuň beýleki klublardan iň esasy aýratynlygy janköýerleri bilen arasyndaky berk aragatnaşykdyr. Bu aýratynlygyny häzir hem gorap gelýän klub o diýen uly býujetli hemaýatkärler bilen işleşmeýär. 2004-nji ýylda ýurduň futbol federasiýasy tarapyndan her klubuň kassasynda azyndan 1,5 million ýewro bolmaly düzgüni girizilýär. Klub şonda-da tasdanam maliýe babatda bankrot bolýardy. Ýöne işewür Dirk Zingler (toparyň häzirki prezidenti) klubuň dadyna ýetişýär we 750 müň ýewrony kluba berýär. Galan 750 müň ýewrony bolsa janköýerler “Bluten für Union” atly kampaniýa esasynda tapýar. Ýagny klubuň tarapdarlary hassahanalara gidip, gan tabşyrýar we garşylygynda alan töleglerini-de kluba berip, 1,5 million ýewro tamamlanýar.
2008-nji ýylda klub ýene bir ýola ygtyýarnamasyny tasdanam ýitirip bilerdi. Klubuň 22 müň orunlyk “Stadion An der Alten Försterei” stadionynyň tribunasynyň bir bölegi çökýär. Ýöne şol çöken ýeri täzeden abatlamak üçin klubuň puly tapylmaýar. Klub ýene bir gezek janköýerlere ýüz tutýar. 2500-e golaý tarapdar 140 sagadyň dowamynda işläp, şol çöken ýerleri oňarýar. Şondan soň klubuň stadiony ýene-de janköýerleriň tagallasy bilen umumy durky täzelenýär. Topar ýerli duşuşyklaryny ady agzalan şol stadionda geçirýär.
“Bundesliga II”-de 20 ýyllap çykyş eden klub 2019/20 möwsüminde Germaniýanyň iň ýokary ligasynda “Bundesliga” çykýar. Topary taryhynda ilkinji gezek “Bundesliga” çykaran tälimçi şweýsariýaly Urs Fişer bolup, ol häzirki wagtda-da kluba tälim berýär. “Bazel” bilen Şweýsariýada 2 gezek çempionlyk gazanan Fişeriň ýolbaşçylygynda klub “Bundesligadaky” ilkinji möwsüminde 11-nji orny eýeläp, aşaky we ýokarky liganyň arasynda gatnap duran “lift” klublardan däldigini görkezýär. 2-nji möwsümini-de 7-nji orunda tamamlap, Ýewropa Konferensiýa Ligasyna gatnaşýar. 3-nji möwsüminde-de gazanylan 5-njilik, klubuň gazanan bu üstünliginiň tötänlik däldigini subut edýär.
Gazanan üstünlikleri
Klubuň şu wagta çenli gazanan iň uly üstünligi Germaniýanyň iň ýokary ligasynda 1923-nji ýyldaky kümüş medaldyr. Şol sanda topar 200/01 möwsüminde kubok ýaryşynda finala çykyp, “Şalkeden” asgyn gelipdi. Ozalky Gündogar Germaniýada geçirilen kubok ýaryşynda 1968-nji ýylda ýeňiji bolan “Union Berlin” GDR-iň 2-nji ligasynda dürli ýyllarda çempionlyk gazanýar. Hatda ol “DDR-Liga” ady bilen geçirilen çempionatyň iň soňky çempionydyr. Germaniýanyň 3-nji ligasy bolan “3. Ligada” hem 2009-njy çempion bolan klubuň sebitleýin ligalarda-da birnäçe çempionlygy bar.
“Bundesligadaky” ýeke-täk derbi
“Union Berliniň” gysga wagtda görkezen bu başarnygy şäheriň beýleki topary Herta bilen deňeşdirilende, juda ýokarydyr. Berliniň “Herta” topary soňky ýyllarda kynlyk bilen ýokary ligada galmagy başarýar. Iki topar 1990-njy ýylyň 27-nji ýanwarynda, iki Germaniýanyň birleşmeginden soň ilkinji gezek duşuşýar. “Hertanyň 2-1 hasabyndaky ýeňşi bilen tamamlana şol ýoldaşlyk duşuşygyna “Olympiastadion”-da 51 müňden gowrak janköýer tomaşa edýär. Şondan soň iki topar özara 12 gezek ýoldaşlyk duşuşygyny geçirýär. Iki topar 2-nji ligada-da 4 gezek gabatlaşyp, şolarda hersi 1 gezek ýeňiş gazanýar. “Bundesligadaky” Berlin derbilerinde bolsa “Union” 5, “Herta” 2 gezek üstün çykýar. 1 oýun deňlikde tamamlanýar. Häzirki wagtda “Bundesligadaky” ýeke-täk şäher derbisi Berlin derbisidir. Aslynda klubuň Berlindäki iň esasy bäsdeşi ozalky “Dinamo Berlin” hasaplanýar. Bu topar häzirki wagtda aşaky ligalarda çykyş edýändigi üçin iki klub soňky ýyllarda duşuşyk geçirmeýär.
Häzirki wagtda toparyň düzümindäki oýunçylaryň transfer bazaryndaky gymmaty 104 million ýewro deň bolup, olaryň arasynda daniýaly derwezeçi Ronnow, portugaliýaly Diogo Leite, awstriýaly Trimmel, germaniýaly Knoçe, wengriýaly Şafer, germaniýaly Haberer, surinamly hüjümçi Şeraldo Beke, amerikaly Pefok dagynyň toparyň şowly ýörişine goşandy uludyr. Germaniýanyň Kubogy ýaryşynda-da göreşi dowam etdirýän “Union Berlin” topary çärýek finalda “Aýntraht” bilen duşuşar.
Çempionlyk gazansa, taryhy ýeňiş bolar
Çempionatda şu möwsümde 21 oýunda 4 gezek utulyp, 13 gezek ýeňiş gazanan “Union Berlin” topary “Leipsig”, “Borussiýa Dortmund” ýaly klublary ýeňlişe sezewar etdi. “Bawariýa” bilenem deňme-deň oýnan klub ýekşenbe güni ýene-de münhenliler bilen duşuşar. Sähelçe wagtyň içinde kanagatlanarly býujet bilen çempionlyk ugrunda göreş alyp barýan topara öwrülen “Union Berliniň” möwsümi nähili tamamlajakdygy belli bolmasa-da, klubuň görkezýän netijesi uly alkyşa mynasypdyr. Eger-de “Union Berlin” möwsümi çempionlyk bilen tamamlasa, 92 ýyldan soň berlinli klublaryň biriniň çempion boldugy bolar. Soňky gezek Berlinden “Herta” kluby 1930-njy we 1931-nji ýyllarda Germaniýanyň iň ýokary ligasynda çempionlyk gazanypdy. “Union Berlin” çempionlyk gazanan ýagdaýynda “Bundesligada” soňky ýyllaryň, belki-de şu asyryň iň uly garaşylmadyk netije bolar.
