Fransiýanyň paýtagty Parižde “The Best FIFA Football” baýraklarynyň ýeňijileri mälim edildi. Iki sagada golaý wagtlap dowam eden dabara futbolyň öňki-soňky ýyldyzlary, meşhur tälimçiler, eminler, ozalky futbolçylar gatnaşdylar. Dabaranyň ilkinji baýragy ýörite baýrak bolup, Pelä berildi. Dekabr aýynda aradan çykan futbolyň şasynyň hatyralap berlen baýragy Peläniň ýanýoldaşy Marsiýa Aoki braziliýaly futbolçy Ronaldonyň elinden aldy. Soňlugy bilen dabaranyň dowamynda 2022-nji ýylyň iň ökde derwezeçileri mälim edildi. Ýylyň zenan derwezeçisi diýlip, “Mançester Ýunaýtedden” Meri Irps saýlandy. 28 ses alan angliýaly derwezeçi bu ugurda çilili Kristiane Endlerden (22) hem-de germaniýaly Ann-Katrin Bergerden (10) tapawutlanmagy başardy. Ýylyň erkek derwezeçisi diýlip hem argentinaly Emiliano Martines yglan edildi. 26 ses alan Martines belgiýaly Tibo Kurtuadan (20) hem-de marokkoly Ýassin Bunudan (14) öňe saýlandy.
Ýylyň iň owadan goluna berilýän Puşkaş baýragyna polşaly paralimpiýa futbolçy Marçin Oleksiý laýyk görüldi. Şeýle-de, FIFA ýylyň janköýeri baýragyna-da argentinaly janköýerler mynasyp boldy. Baýragy argentinaly tarapdarlaryň adyndan ýaşuly deprekçi janköýer aldy.
Ýylyň tälimçileri hökmünde-de zenanlardan niderland tälimçi Sarina Wigman, erkeklerden argentinaly Lionel Skaloni iň gowy FIFA futbol baýragyna mynasyp boldy. Wigman geçen ýyl Angliýanyň ýygyndysyna taryhynda ilkinji Ýewropa çempionlygyny gazandyrypdy. 2017-nji we 2020-nji ýyllardan soň 3-nji gezek bu hormata mynasyp görlen Wigman 28 ses alyp, ol fransiýaly Sonia Bompastordan hem-de şwesiýaly Pai Sandheýjden öňe saýlandy.
Katar 2022-de Argentinanyň ýygyndysyna 36 ýyldan soň 3-nji Dünýä Kubogyny gazandyran 44 ýaşyndaky Skaloni (28 ses) italiýaly Karlo Ançelottiden (17) hem-de Pep Guardioladan (12) köp ses aldy.
Dabara tamamlanyp barýarka “FIFA Fair-Play” baýragynyň eýesi-de mälim edildi. Gruziýaly goragçy Luka Lokoşwili geçen möwsümde Awstriýanyň “Wolfsburger” toparynyň düzüminde çykyş edýärdi. Ol “Austria Wien” klubunyň oýunçylaryndan Georg Teigli dilini ýerde dilini ýuwudyp ýatyrka, ony ölümden halas edýär. Şol sebäpli-de häzirki wagtda “Kremoneze” toparynda oýnaýan Lokoşwili bu baýraga mynasyp görüldi.
FIFA FIFPro ýylyň simwolik ýygyndylary hem mälim edilip, erkekleriň toparyna Tibo Kurtua, Aşraf Hakimi, Wirgil Wan Deýk, Žoao Kanselo, Kazemiro, Luka Modriç, Kewin De Bruýne, Lionel Messi, Erling Holann, Kilian Mbappe hem-de Karim Benzema saýlandy. Zenanlaryň simwolik ýygyndysyna bolsa Kristiane Endler, Lusi Bronz, Mapi Leon, Wendi Renar, Lea Williamson, Lena Oberdorf, Aleksiýa Putalýas, Kira Wolş, Sem Kerr, Bet Mid hem-de Aleks Morgan dagy alyndy.
Messiniň 77-nji şahsy baýragy
Dabaranyň ahyrynda-da FIFA-nyň prezidenti Janni Infantino iň garaşylýan baýraklaryň ýeňijilerini mälim etdi. Ol ilki 2022-nji ýylyň iň ökde zenan futbolçysynyň adyny aýtdy. Onuň açan bukjasyndan bu ýylam “Barselonanyň” ispaniýaly ýyldyzy Aleksiýa Putelýasyň ady çykdy. Bassyr 2-nji gezek bu hormata laýyk görlen 29 ýaşyndaky futbolçy 50 ses bilen amerikaly Aleks Morgandan hem-de angliýaly Bet Midden öňe saýlandy. Iň köp garaşylan pursatda Janni Infantino argentinaly super ýyldyz Lionel Messiniň geçen ýylyň iň ökde oýunçysydygyny resmi ýagdaýda mälim etdi. PSŽ-li ýyldyz bu ugurda klubdaşy Kilian Mbappeni hem-de “Real Madridiň” Çempionlar Ligasyny gazanmagynda esasy rol oýnan Karim Benzemany yzda galdyrdy. Messi 52, Mbappe 44, Benzema 34 ses almagy başardy. 35 ýaşyndaky Messi bu baýragy 2019-njy ýylda-da gazanypdy. Ol 2 gezek eýelän Robert Lewandowski hem-de Kristiano Ronaldo bilen deňleşdi. Şeýle-de, bu arzyly baýrak Lionel Messiniň gazanan 77-nji şahsy baýragydyr.
