Germaniýanyň iň güýçli kluby “Bawariýada” garaşylmadyk, belki-de garaşylýan waka boldy. Wagtal-wagtal özüni alyp barşy bilen baglanyşykly käbir habarlar çykýan toparyň tälimçisi Ýulian Nagelsmann wezipesinden boşadyldy. “Bawariýa” “Bundesligada” soňky tapgyrda myhmançylykda “Baýerden” 2-1 asgyn gelip, liderligi “Borussiýa Dortmunda” aldyrypdy. Milli ýygyndylar sebäpli dowam edýän arakesmede klub türgenleşiklerini dowam etdirýär. Ýöne tälimçi Nagelsmann bolsa Awstriýada lyža edip ýörmegi klubuň ýolbaşçylary tarapyndan berk ýazgaryldy. Bu ýagdaýyň klubuň öňden gelýän ýörelgesine, däbine, ýoluna tersdigi aýratyn bellenildi. Klubuň ýolbaşçylarynyň umumylykda gelen netijesi, 35 ýaşyndaky hünärmeni wezipesinden boşatmak boldy. Çempionatdaky azda-kände şowsuzlyklar, şeýle-de, Nagelsmannyň eden soňky hereketi, tälimçilik oturgyjynda görkezýän käbir hereketleri, gol geçirilende käbir begençli edýän çenden aşa hereketleri – umumylykda şu zatlar göz öňünde tutulyp, ýaş tälimçi wezipesinden boşadyldy. Tälimçilige “Hoffenhaýmda” başlap, “Leipsig” bilen ýokary derejä çykan Nagelsmann 2021-nji ýylyň tomsunda “Bawariýanyň” tälimçiligine bellenilipdi. Klub onuň ýolbaşçylygynda “Bundesligada” 1 çempionlyk gazandy. 2 gezek hem Germaniýanyň Super Kubogyny eýeledi. Nagelsmann “Bawariýada” 84 oýunda 60 gezek ýeňiş gazanyp, 10 oýunda-da utuldy (14 deňlik). “Bawariýa” şu möwsümde Çempionlar Ligasynda çärýek finala çykyp, “Mançester Siti” bilen bije çekişipdi.
“Bawariýanyň” indiki tälimçisiniň germaniýaly Tomas Tuhel bolmagyna garaşylýar. “Real Madrid” bilenem ady agzalýan Tuheliň şu gün-erte wezipä geçer diýlip pikir edilýär. Tuhel bellenen ýagdaýynda onuň ilkinji synagy ozalky kluby “Borussiýa Dortmundyň” garşysyna bolar. 1-nji aprelde “Bawariýa” öz meýdançasynda 2 utuk öňde barýan “Bawariýany” kabul eder.
