UEFA Çempionlar Ligasynyň çärýek finalynda kubogyň häzirki eýesi “Real Madrid” öz meýdançasynda “Çelsi” bilen duşuşdy. Geçen ýylam çärýek finalda gabatlaşan toparlaryň bu gezekki oýnunda “Real Madrid” 2-0 hasabynda ýeňiş gazandy. Madridlilere ýeňiş getiren gollary 22-nji minutda Karim Benzema hem-de 74-nji minutda oýna 71-nji minutda giren Marko Asensio geçirdi. Duşuşygyň 59-njy minutynda “Çelsiniň” çep gyraky goragçysy Ben Çilwell emin tarapyndan gyzyl kart görkezilip, meýdançadan çykaryldy. Duşuşykda 1-nji goly geçiren Benzemanyň Çempionlar Ligasyndaky gollarynyň sany 90-a ýetdi. Çempionlar Ligasynda “Realyň” köýnekçesi bilen 130-njy gezek meýdança çykan Benzemadan öňde Lewandowski (91), Messi (128) hem-de Ronaldo (140) bar. Şeýle-de, Benzema utulan-çykdy tapgyrynda 14-nji, çärýek finalda-da 8-nji gezek tapawutlandy. Ol çärýek finalda geçiren 8 golunyň 5-sini “Çelsiniň” derwezesinden girizdi. Benzema Çempionlar Ligasynda soňky 11 golunyň ählisini-de iňlis klublarynyň derwezesinden geçirdi (“Çelsi” – 5, “Liwerpul” – 3, “Mançester Siti” – 3). “Real Madridiň” 2-nji goluny geçiren Asensio oýna soňdan goşulyp, 9-njy gezek tapawutlandy. Ol bu ugurda rekordyň eýesi bolup, Ole-Gunnar Sulşer, Karim Benzema, Tomas Müller dagy oýna ätiýaçdan girip, 7 gol geçirdiler. “Real Madridiň” tälimçisi Karlo Ançelotti ispan kluby bilen bu ýaryşdaky 35-nji ýeňşini gazanyp, Del Boskeden öňe saýlandy. Şeýle-de, “Real Madrid” Çempionlar Ligasynda öz meýdançasyndaky soňky 31 duşuşygynda-da gol geçirmegi başardy. Madridliler soňky gezek 2011-nji ýylda “Barselonanyň” derwezesinden gol geçirip bilmändi.
“Çelsi” bolsa umumylykda bassyr 4 oýundan (3-si çempionat) bäri gol geçirip bilmän gelýär we bu görkeziji soňky 30 ýylda ilkinji gezek gaýtalanýar.
