Italiýanyň çempionaty “Serie A”-da 30-njy tapgyr öňdebaryjy klublaryň arasynda rimlilerden galanlary üçin şowly geçmedi. Sanawyň lideri “Napoli” öz meýdançasyna “Werona” bilen golsuz deňme-deň oýnady. Soňky çempion “Milan” myhmançylykda “Bolonýa” bilen utuklary paýlaşdy. Eýýäm 34-nji sekuntda Sansoneniň goly bilen öňe geçen “Bolonýa toparyna “Milan” 40-njy minutda Pobeganyň goly bilen jogap berdi. “Inter” bolsa “Monzadan” Kaldirolanyň 78-nji minutda geçiren goly esasynda 1-0 asgyn geldi. “Inter” toparyna bassyr 3 oýundan bäri Juseppe Meazzada gol geçirmek başardanok. Şeýle statistika “Serie A”-da “Inter” üçin ilkinji gezek hasaba alyndy. “Ýuwentus” bolsa myhmançylykda “Sassuolodan” 1-0 hasabynda utuldy.
Rimlileriň peýdasyna tamamlanan tapgyr
2-nji ýerdäki “Lasio” myhmançylykda “Spesiýany” 3-0 utdy. Duşuşykda rimlileriň 1-nji goluny geçiren Çiro Immobile soňky 7 möwsümiň hersinde azyndan 10 gol geçiren ilkinji futbolçy boldy. Edil şeýle hasap bilen “Roma” öz meýdançasynda “Udinezeni” ýeňlişe sezewar etdi. Her toparyň bir penalti gaçyran oýnunda rimlileriň gollaryny Bowe, Pellegrini hem-de Abraham derwezä girizdi.
