2024-nji ýylda Biodürlülik sammitiniň (COP16) Kolumbiýada geçiriljekdigi mälim edildi. Bu barada ýurduň daşary işleri ministri habar berdi. 2024-nji ýylyň 21-nji oktýabry bilen 1-nji noýabry aralygynda geçiriljek ýokary derejeli ýygnakda biologik dürlüligiň goralmagy we aýawly saklanmagy üçin dürli mejlisler geçiriler. Günorta Amerikanyň biodürlülik babatda baý ýurtlarynyň biri bolan Kolumbiýada geçiriljek halkara maslahata dünýäniň 200-den gowrak ýurdundan we sebitinden wekiliýetler gatnaşar.
Birleşen Milletler Guramasynyň Biologik Dürlülik Şertnamasynyň Sekretariýatynyň başlygynyň wezipesini wagtlaýyn ýerine ýetiriji Dewid Kuper Sekretariýatyň Kolumbiýa hökümetiniň COP16-y kabul etmeginden hoşallyk duýýandygyny, bu ýurduň häzirki wagtda ajaýyp biodürlülige eýedigini belledi.
