Türkiýäniň “Beşiktaş” topary Portugaliýanyň milli ýygyndysynyň ozalky tälimçisi, 69 ýaşyndaky hünärmen Fernando Santuş bilen 1,5 ýyllyk şertnama baglaşdy we topar onuň ýolbaşçylygyndaky ilkinji duşuşykda myhmançylykda “Çaýkur Rizespordan” 4-0 üstün çykdy.
Italiýanyň Kubogy ýaryşynda çärýek finalda “Fiorentina” bilen “Bolonýa” duşuşyp, oýnuň esasy we goşmaça wagtynda hasap açylmansoň, penaltileriň netijesinde 5-4 ýeňiş gazanan “Fiorentina” ýarym finala çykdy.
Italiýanyň Kubogy ýaryşynda şu gün çärýek finalyň ýene-de 2 duşuşygy oýnalyp, Rim derbisinde “Lasio” bilen “Roma” (22:00), şol sanda “Milan” bilenem “Atalanta” (01:00) klublary ýarym finala çykmak üçin göreşer.
Angliýanyň Liga Kubogynyň ýarym finalynyň 1-nji duşuşygynda “Çelsi” myhmançylykda “Middlsbrodan” Hekniniň 37-nji minutda geçiren ýeke-täk goly bilen 1-0 asgyn geldi (Jogap duşuşygy 23-nji ýanwarda oýnalar).
Angliýanyň Liga Kubogynyň beýleki ýarym final duşuşygynda “Liwerpul” öz meýdançasynda “Fulham” topary bilen duşuşar (01:00).
Şu gije Saud Arabystanynda Ispaniýanyň Super Kubogy ýaryşynyň ýarym finalynda “Real Madrid” bilen “Atletiko Madrid” klublary duşuşarlar (00:00).
“Bundesliganyň” lideri “Baýer” toparynyň nigeriýaly hüjümçisi Wiktor Bonifase milli ýygyndynyň türgenleşiginde şikes alyp, ol azyndan aprel aýyna çenli meýdança çykyp bilmez.
“Premier Liganyň” wekili “Tottenham” topary nemes kluby “Leipsigden” hüjümçi Timo Werneri möwsümiň ahyrynda transfer edip bilmek mümkinçiligi bilen kärendesine düzümine goşdy.
Italiýanyň “Milan” kluby “Weronanyň” ýerli goragçysy Filippo Terraççanony 4,5 million ýewro transfer edip, 20 ýaşly oýunçy bilen 4,5 ýyllyk şertnama baglaşdy.
Angliýanyň çempionatyny “Premier Liganyň” lideri “Liwerpulyň” sag gyraky oýunçysy Trent Aleksander-Arnoldyň şikes alandygy mälim edilip, onuň birnäçe hepde oýnap bilmejekdigi habar berildi.
