Kot-d’Iwuarda dowam edýän 34-nji Afrika Milletler Kubogynda garaşylmadyk netijeler hasaba alyndy. Ýer eýeleri Kot-d’Iwuaryň ýygyndysynyň Gwineýa-Bissaunyň ýygyndysyny 2-0 ýeňen duşuşygy bilen başlan çempionatda öňdebaryjy toparlaryň 2-si deňme-deň oýnap, biri-de ýeňlişe sezewar boldy.
“A” toparçada Nigeriýanyň ýygyndysy Ekwator Gwineýasynyň ýygyndysy bilen 1-1 deňme-deň oýnady. Salwadoryň 36-njy minutdaky goluna Nigeriýanyň ýygyndysy Osimheniň 38-nji minutdaky goly bilen jogap berdi.
“B” toparçada Müsüriň ýygyndysy Mozambigiň ýygyndysy bilen duşuşyp, soňky minutlarda ýeňlişden halas boldy. 2-nji minutda Mostafa Mohamediň goly bilen öňe geçen müsürli futbolçylar 2-nji ýarymyň başlarynda Wito (56) bilen Klesionyň (58) 2 minutda geçiren gollaryna çäre tapyp bilmedi. Oýnuň 90+7-nji minutynda eminiň bellän penaltisini dürs uran Mohamed Salah toparyny ýeňlişden halas etdi.
Tapgyryň iň garaşylmadyk netijesi Gana bilen Kabo Werdeniň arasyndaky duşuşykda hasaba alyndy. 17-nji minutda Monteironyň goly bilen öňe geçen Kabo Werdeniň derwezesinden deňlik goluny 56-njy minutda Džiku geçirdi. Ýöne 90+2-nji minutda Rodrigesiň goly bilen Kabo Werde ýeňiş gazanan tarap bolup, Gana ilkinji duşuşygynda ýeňiş gazanyp bilmedi.
Şu gün “C” toparçanyň çäginde Senegal – Gambiýa (19:00), Kamerun – Gwineýa (22:00) hem-de D toparçada Alžir – Angola (01:00) duşuşyklary geçiriler.
“A” TOPARÇA:
Kot-d’Iwuar – Gwineýa-Bissau: 2-0 (Seko Fofana 4, Krasso 58)
Nigeriýa – Ekwator Gwineýasy: 1-1 (Osimhen 38 – Salwador 36)
“B” TOPARÇA
Müsür – Mozambik: 2-2 (Mostafa Mohamed 2, Salah 90+7 p – Witi 56, Klesio 58)
Gana – Kabo Werde: 1-2 (Džiku 56 – Monteiro 17, Rodriges 90+2)
