Arkadagly Gahryman Serdarymyzyň «Ýaşlar – Watanyň daýanjy» atly kitabynyň çapdan çykyp halk köpçüligine gowuşmagy ähli watandaşlarymyz üçin «Pähim-paýhas ummany Magtymguly Pyragy» ýyly diýlip atlandyrylan täze ýylyň garşylanýan günlerinde mynasyp baýramçylyk sowgady boldy. Kitapda ýerleşdirilen ähli jümleleri okanyňda, körpeje çagalaryň, ýaşlarymyzyň dürli ugurlarda okaýan, döredýän, gurýan pursatlaryndan düşürilen suratlary synlanyňda ata Watanymyza, hormatly Prezidentimize, Gahryman Arkadagymyza bolan söýgiň has-da artýar. Çünki bu kitap ýaşlarymyzyň durmuşyna, ykbalyna, ähli ulgamlarda gazanan üstünliklerine bagyşlanýar. Kitapda ýaş nesillerimiziň durmuşymyzda, jemgyýetimizde tutýan ornuna mynasyp baha berlip, ýaşlaryň geçen ýyldaky gazanan ýokary netijeleri açylyp görkezilýär. Şular dogrusynda giňişleýin beýan edilen bu kitapda hormatly Prezidentimiz ýaşlarymyzyň Arkadag Serdarly bagtyýar ýaşlar ýylynda ýerine ýetirilen işlerini anyk mysallar bilen beýan edipdir. «Biz geljegimizi ýaşlarymyz bilen bilelikde gurýarys. Şeýle ýaşlary bolan halk beýik halkdyr. Şeýle beýik halky bolan döwlet beýik döwletdir» diýip Arkadagly Gahryman Serdarymyz özüniň ilkinji kitabynda belläp geçýär. Dogrudan hem Watanymyzyň daýanjy, sarsmaz sütüni, röwşen ertirlerini gurujylar ýaşlardyr. Berkarar Watanymyzda ýaşlarymyz halk hojalygynyň ähli pudaklarynda zähmet çekip, abraý-mertebä eýe bolýarlar. Bu bolsa ýurdumyzyň halk hojalygynyň ähli pudaklarynyň sazlaşykly ösüşini gazanmaga uly mümkinçilik berýär.
Hormatly Prezidentimiziň «Ýaşlar – Watanyň daýanjy» kitaby «Beýik işlere çakylyk», «Nurana geljegiň aladasynda», «Ýaşlar barada döwlet syýasatynyň esaslary», «Ýaşlar we Magtymguly adyndaky Ýaşlar guramasy», «Ýaşlar bilim ulgamynda», «Ýaşlygyň we ýeňişleriň ýoly», «Ýaş türkmen zenanlary berkarar ýurduň mertebe tugy», «Sanly dünýä: ýaşlar, ösüş, gelejek», «Ýaşlar we şäher gurluşygy», «Watan goragy ynamly gollarda», «Milli mirasymyzyň eýeleri: Edebiýat, sungat we ýaşlar», «Halkymyzy buýsandyrýan hoş habarlar – Arkadag Serdarly bagtyýar ýaşlar ýylynda ýaşlarymyzyň gazanan üstünlikleri», «Bilim ulgamynda tapawutlanan ýaşlar», «Arkadag Serdarly bagtyýar ýaşlar ýylynda ýaşlar bilen bagly kabul edilen resminamalar, ýaşlara iberilen gutlaglar», «Ýaşlar bilen geljegimizi gurýarys» ýaly birnäçe bölümlerden ybarat. Bu bölümleriň ählisinde hem Arkadagly Gahryman Serdarymyz häzirki wagtda ýurdumyzda gazanylan üstünlikler, ýetilen belent sepgitler, ýaşlaryň durmuşy bilen bagly alnyp barylan işler dogrusynda giňişleýin beýan edipdir.
Täze kitapda getirilýän maglumatlaryň, beýan edilýän pikirleriň her biri ähli ynsanlary, esasan hem, ýaşlarymyzy zähmet üstünliklerine ruhlandyrýar. Kitapda şeýle sözler bar: «Türkmen ýaşlary döwletden arkalydyr. Döwlet sarsmaz, tükenmez uly güýçdür. Biz döwletimiziň güýjünden güýç alýarys». Elbetde, bu sözlerde ýaşlarymyza bolan uly ynam bar. Asylly ýol-ýörelgeleri mynasyp dowam etdirýän ýaşlarymyz beýik işleri başarýarlar. Biz hem ýurdumyzyň bagtyýar ýaşlary bolup hormatly Prezidentimiziň, Gahryman Arkadagymyzyň ynamyny ödemek, ýurdumyzyň ösüşine ähli babatda mynasyp goşant goşmak ugrunda ähli ukyp-başarnygymyzy gaýgyrman zähmet çekmek bilen, «Pähim-paýhas ummany Magtymguly Pyragy» ýylyny hem uly zähmet üstünliklerine besläris. Arkadagly Gahryman Serdarymyzyň mundan beýläk hem galamy ýiti bolsun, biz ýaşlary bagtyýar geljege ugrukdyrýan şeýle manyly eserleriniň höwri köp bolsun.
Gülhumar HOJAHMETOWA,
Türkmenistanyň Agrar partiýasynyň Daşoguz welaýatynyň Köneürgenç etrap komitetiniň esasy hünärmeni.
