Tennis boýunça möwsümiň ilkinji “Uly tuwulga” ýaryşy “Awstraliýa Açykda” zenanlaryň arasynda çempion belli boldy. 2-nji belgidäki belarusy Aryna Sabalenka bilen 12-nji ýerdäki hytaýly Çžen Sinweniň arasyndaky final duşuşygy uzak wagtlap dowam etmedi. 77 minutda tamamlanan oýunda Sabalenka 2 setde garşydaşyny ýeňmegi başardy. 1-nji setde 6:3, 2-nji setde 6:2 hasaplar bilen ýeňiş gazanan Sabalenka “Awstraliýa Açykda” bassyr 2-nji gezek çempion diýen ady eýeledi. Ol watandaşy Wiktoriýa Azarenkadan (2012, 2013) soň çempionlygyny goran ilkinji zenan tennisçi boldy. Sabalenka çempion hökmünde 2,1 million amerikan dollary (3 million 150 müň awstraliýa dollary) pul baýragy bilen sylaglanar.
Erkekleriň arasyndaky final duşuşygy ertir oýnalar we italiýaly Ýannik Sinner bilen russiýaly Daniil Medwedew çempionlyk ugrunda göreşer.
