UEFA Ýewropa Ligasynda pleý-off tapgyrynyň 1-nji duşuşyklary geçirildi. Tapgyryň iň uly hasaply ýeňşini türk hem-de niderland toparlary gazandy. Žoze Mourinionyň tälim berýän “Fenerbahçe” topary öz meýdançasynda “Anderleht” toparyny Tadiç (11), Jeko (42) hem-de En-Nesiriniň (57) gollary esasynda 3-0 hasabynda ýeňlişe sezewar etdi.

Türkiýäniň başga bir kluby “Galatasaraýyň” duşuşygynda-da 3 gol aratapawudy hasaba alnyp, ýurduň çempiony Niderlandlaryň “AZ Alkmaar” toparyndan 4-1 hasabynda ýeňildi. 2-nji ýarymy 1 oýunçy kem oýnan “Galatasaraýyň” derwezesinden gollary Miýnans (12), Parrott (37 p), Klasi (57) hem-de Wolfe (66) geçirdi.

Niderlandlaryň başga bir topary “Aýaks” üçinem 1-nji duşuşyk şowly tamamlandy. Myhmançylykda Belgiýanyň “Ýunion Sent-Žilluaz” toparyny Rasmusson (59) hem-de Mokionyň (71) gollary bilen 2-0 ýeňip, 1/8 finala sary ilkinji ädimi ätdi.

Tapgyryň öňe saýlanýan duşuşygynda “Porto” bilen “Romanyň” arasyndaky oýunda ýeňiş gazanan bolmady. Duşuşygyň soňky 20 minutyny 1 oýunçy az oýnan “Romadan” Zeki Çeligiň 45+5-nji minutdaky goluna ýer eýeleri 67-nji minutda Mouranyň goly bilen jogap berdi.

FKSB myhmançylykda PAOK-y, “Real Sosiedad” myhmançylykda “Midtýullanny”, “Twente” öz meýdançasynda “Bude-Glimti” 2-1 hasabynda ýeňlişe sezewar etdi.

“Ferenswaroş” bolsa “Wiktoriýa Plzenden” Abu Faniniň 23-nji minutdaky ýeke-täk goly esasynda üstün çykmagy başardy.

Jogap duşuşyklary 20-nji fewralda oýnalar.

Gyzykly bolup bilerЕЩЕ ОТ АВТОРА