Gündelik iýilmegi maslahat berilýän gök önümleriň we miweleriň kadaly möçberi kesgitlendi. Uzak ýaşamak üçin her gün iki miwe we üç gök önüm iýmeli. Bu baradaky pikiri Garward uniwersitetiniň (ABŞ) Jemgyýetçilik saglygy mekdebiniň alymlary öňe sürdüler. Olaryň bu ugurdaky ylmy-barlag işi «Circulation» žurnalynda çap edildi. Alymlar ýüz müňden gowrak adamyň gatnaşmagynda iki sany uly göwrümli ylmy-barlag işini amala aşyrdylar. Bu adamlar hakyndaky maglumatlar otuz ýylyň dowamynda ýygnaldy. Her 2-4 ýyldan ylmy-barlaga gatnaşyjylar özleriniň iýmitlenişi barada alym lukmanlara jikme-jik maglumat berdiler. Mundan başga-da, seljermäniň çäklerinde olaryň gök önümler we miweler bilen iýmitlenmegi baradaky maglumatlar hem hasaba alyndy. Şonuň netijesinde, her gün gök önüm hem-de miwe iýmegiň adam saglygyna peýdalygyny, ýöne olaryň möçberiniň artdyrylmagynyň hiç hili goşmaça täsiriniň ýokdugy mälim edildi. Mundan başga-da, uzak we sagdyn durmuş üçin iň amatly gündelik iýmitde ösümliklerden gelýän önümleriň gatnaşygy aşakdaky ýaly bolmaly: iki miwe we üç gök önüm.
Gurbangeldi HAÝDAROW,
Türkmen döwlet binagärlik-gurluşyk institutynyň mugallymy.