Angliýanyň çempionatynda Londonyň öňdebaryjy klublary bu tapgyry ýeňiş bilen tamamladylar. Tapgyryň merkezi duşuşygynda “Tottenham” topary myhmançylykda “Mançester Sitini” Jonsonyň (35) hem-de Palinýanyň (45+2) geçiren gollary bilen 2-0 hasabynda ýeňdi. Guardiola tälimçilik karýerasynda “Tottenham” toparyndan 10-njy gezek ýeňildi. Guardiolany “Tottenhamdan” öň diňe “Liwerpul” 10 gezek ýeňipdi.

London derbisinde “West Ham” öz meýdançasynda öňe geçendigine garamazdan, “Çelsiden” 5-1 hasabynda asgyn geldi (Paketa 6 – Žoao Pedro 15, Pedro Neto 23, Fernandes 34, Kaisedo 54, Çaloba 58). Londonyň başga bir kluby “Arsenal” öz meýdançasynda “Lids Ýunaýtediň” derwezesinden joagpsyz 5 gol girizdi. Gollaryň 2-sini täze transfer Gýokereş (48, 90+4 p), beýleki 2-sini goragçy Timber (34, 56) hem-de Saka (45+1) öz atlaryna ýazdyrdylar. “Fulham” bilen myhmançylykda 1-1 (Smit-Rou 73 – Muniz 58 ö.d.) hasabynda deňme-deň oýnan “Mançester Ýunaýted” bu tapgyrda-da ýeňiş gazanyp bilmedi. Oýunda 38-nji minutda “Ýunaýtedden” Bruno Fernandeşiň uran penalti urgusy sowa geçdi. “Ewerton” topary öz meýdançasynda “Braýtony” Ndiaý hem-de Garneriň gollary bilen 2-0 hasabynda ýeňdi. Geçirilen 2 goluň pasyny hem täze transfer Jäk Griliş berdi. Duşuşykda “Ewertonyň” täze stadiony “Hill Dickinson” stadionynda oýnaldy. 52 müň 769 orunlyk bu desga klubuň ozalky 133 ýyllyk taryhy stadiony “Goodison Park”-yň deregine guruldy.

2-nji tapgyryň duşuşyklary:

West Ham – Çelsi: 1-5, Man. Siti – Tottenham: 0-2, Börnli – Sanderland: 2-0, Bornmut – Wulwerhempton: 1-0, Brentford – A. Willa: 1-0, Arsenal – Lids: 5-0, K. Palas – N. Forest: 1-1, Ewerton – Braýton: 2-0, Fulham – M. Ýunaýted: 1-1, Nýukasl – Liwerpul (şu gije).

Gyzykly bolup bilerЕЩЕ ОТ АВТОРА