Irlandiýa we Ispaniýa Palestinany resmi taýdan ykrar edýär

Irlandiýa we Ispaniýa hem Norwegiýa eýerip, Palestinany garaşsyz döwlet hökmünde resmi taýdan ykrar edýändiklerini mälim etdiler. Bu barada TASS habarlar gullugy habar edýär.
Ispaniýanyň Premýer-ministri Pedro Sançes 22-nji maýda Madriddäki Wekiller kongresinde (parlamentiň aşaky palatasy) çykyş edip, Patyşalygyň Palestina döwletini ykrar edýändigini mälim etdi. Ispaniýanyň Ministrler Geňeşi bu karary 28-nji maýda resmi taýdan tassyklar.
Irlandiýanyň Premýer-ministri Saýmon Harris 22-nji maýda Dublinde geçirilen metbugat ýygnagynda öz ýurdunyň Palestinany garaşsyz döwlet hökmünde ykrar edýändigini mälim etdi.
-Şu gün Norwegiýa we Ispaniýa bilen bilelikde äden ädimimiz Palestinanyň döwletlilik hukugyny güýçlendirýär – diýip, Irlandiýanyň hökümet Başlygy belledi.
-Bu ädim, iki halk üçin iki döwletiň ýörelgesine esaslanýan çözgüt üçin şertsiz goldawyň tassyklamasydyr– diýip, Harris belledi.
Mundan öň Norwegiýa Palestinanyň döwlet hökmünde ykrar edilendigini resmi taýdan yglan etdi. Skandinaw döwletiniň Premýer-ministri Ýonas Gar Stýore palestinalylaryň öz döwletlerine garaşsyz bolmak hukugynyň bardygyny aýtdy. – Palestina bilen Ysraýylyň arasyndaky territorial çäk, 1967-nji ýylyň 4-nji iýunyndan öň kesgitlenen serhetlere esaslanmalydyr – diýip, ol belledi. Bu karar 2024-nji ýylyň 28-nji maýynda resmi taýdan güýje girer.