“Arsenalyň” 65 million ýewrolyk täze ýarymgoragçysy

Londonyň “Arsenal” topary ispan kluby “Real Sosiedaddan” ýarymgoragçy Martin Zubimendini transfer etdi. “Arsenalyň” kassasyndan bu transfer üçin umumylykda 65 million ýewro çykar. 26 ýaşyndaky ispan futbolçysy “Arsenal” bilen 2030-njy ýyla çenli şertnama gol çekişdi. 2016-njy ýylda “Real Sosiedad B” toparynda futbola başlan Zubimendi san-sebastianlylaryň düzüminde 236 duşuşykda 10 gezek tapawutlandy. Ispaniýanyň milli ýygyndysynda hem çykyş edýän Zubimendi matadorlaryň köýnekçesini 19 oýunda geýdi. Zubimendi “Arsenalda” 36-njy belgili köýnekçäni geýer. “Arsenal” geçen tomusda-da “Real Sosiedaddan” Mikel Merinony transfer edipdi. Norwegiýaly oýunçy Martin Edegor hem 2020-nji ýylda “Real Madridden” “Arsenala” geçmezden öň “Real Sosiedadda” kärendesine oýnapdy.