Ispaniýanyň Şa Kubogy ýaryşynda kubogyň häzirki eýesi “Atletik Bilbao” bu gezek çärýek finala-da çykyp bilmedi. 1/8 finalda öz meýdançasynda “Osasuna” bilen duşuşan bilbaolylar 3-2 hasabynda ýeňlişe sezewar boldy. Myhmanlar 1-nji ýarymyň ahyrynda has takygy Orozyň 40-njy, Budimiriň 44-nji (p) minutdaky gollary bilen 2-0 öňe saýlandy. Ýöne ýer eýeleri Niko Williamsyň (45+3) hem-de De Markosyň (55) gollary bilen hasaby deňlemegi başardy. Duşuşygyň 70-nji minutynda Budimir özüniň 2-nji goluny geçirip, “Osasuna” çärýek finalyň petegini gazandyrdy.

1/8 finalyň ýene bir duşuşygynda bolsa “Real Sosiedad” öz meýdançasynda “Raýo Wallekanony” 3-1 hasabynda ýeňdi. Duşuşykda ýeňiş gazanan toparyň gollaryny Oýarzabal (23), Olasagati (45+1) hem-de Gomes (79) geçirse, myhmanlaryň adyndan ýeke-täk goly 45+7-nji minutda penaltiden Treho öz adyna ýazdyrdy.

Şunlukda, “Atletiko Madrid”, “Barselona”, “Hetafe”, “Leganes”, “Osasuna”, “Real Madrid”, “Real Sosiedad” hem-de “Walensiýa” toparlary çärýek finala çykmagy başardy.

Ispaniýanyň Şa Kubogynda çärýek finalyň bijeleri duşenbe güni, 20-nji ýanwarda çekiler. Çärýek finalyň oýunlary bolsa 4-6-njy fewral aralygynda geçiriler.

ЭТО МОЖЕТ БЫТЬ ИНТЕРЕСНОЕЩЕ ОТ АВТОРА