PDF
Ispaniýanyň Super Kubogy ýaryşynyň finalynda bassyr 3-nji gezek dünýäniň iň uly duşuşygy hasaplanýan “El Klasiko” oýnalar.
Saud Arabystanynyň Jidda şäherinde geçirilýän ýaryşyň ýarym finalynda “Real Madrid” topary “Malýorkany” 3-0 hasabynda ýeňlişe sezewar etdi. 1-nji ýarymy golsuz geçen oýunda madridliler gollarynyň 2-sini 90-njy minutdan soň geçirdi. Oýnuň 63-nji minutynda Jud Bellingam hasaby açdy. 90+2-nji minutda batly urlan top goragçy Walýente degip, derwezä girdi. Oýnuň 90+5-nji minutynda bolsa Rodrigo duşuşyga soňky nokady goýdy. Şunlukda, “Real Madrid” topary ýaryş 4 toparly formata geçeninden soň, ýagny 2020-nji ýyldan bäri bassyr 3-nji, umumylykda-da 4-nji gezek finalda oýnamaga hukuk gazandy.
“Real Madridiň” finaldaky garşydaşy soňky 2 ýylda bolşy ýaly, olaryň köne bäsdeşi “Barselona” bolar. “Barselona” ýarym finalda “Atletik Bilbaony” ýaş ýyldyzlary Gawi hem-de Ýamalyň gollary bilen 2-0 hasabynda ýeňipdi.
“Real” bilen “Barselona” toparlarynyň geçen ýylky duşuşygynda madridliler 4-1, ondan öňki ýylda oýnalan finalda bolsa katalonlar 3-1 ýeňipdi.
Final duşuşygy 12-nji ýanwarda ýagny ýekşenbe gününde Jiddadaky “King Abdullah Sports City” stadionynda oýnalar we duşuşyk Aşgabat wagty bilen 00:00-da başlanar. Duşuşyga Hesus Hil Manzano eminlik eder. Duşuşyk birnäçe teleýaýlym (Match TV, Varzish…) arkaly görkeziler.
