Ispaniýanyň Şa Kubogynda 1/8 finalda “La Liganyň” klublary aşaky ligalaryň wekilleriniň ählisini hem ýaryşdan çykardy. 3-nji liganyň wekili “Ourense” topary öz meýdançasynda “Walensiýadan” 2-0 hasabynda asgyn geldi (Karmona 50 ö.d., Sadik 78). “Hetafe” hem myhmançylykda 4-nji ligadan gatnaşýan “Pontewedrany” Rodrigesiň 2-nji minutdaky ýeke-täk goly bilen ýeňlişe sezewar etdi.

2-nji liganyň topary “Almeriýa” bilen “La Liganyň” wekili “Leganesiň” arasyndaky oýunda 5 gol geçirilip, myhmanlar 3-2 hasabynda ýeňiş gazandy.

Madridiň “Atletikosy” hem myhmançylykda Elçe bilen duşuşyp, garşydaşynyň derwezesinden jogapsyz 4 gol geçirdi. Gollary Sörlot (8, 29 p), Rikelme (61) hem-de Alwares (75) derwezä girizdi. “Atletiko Madrid” ähli ýaryşlary hasaba alanyňda yzly-yzyna 15-nji ýeňşini baýram etdi. Bu ugurda yklymyň rekordy “Bawariýa” degişlidir (23 ýeňiş).

“Barselona” öz meýdançasynda “Betisi”  5-1 hasabynda ýeňdi. Duşuşykda katalonlaryň gollaryny Gawi, Kunde, Rafinýa, Torres hem-de Ýamal geçirdi. “Barselona” topary soňky 15 ýylda 14-nji gezek çärýek finala çykdy. Rafinýa karýerasy boýunça ilkinji gezek bir möwsümde 20 gol saldy (ähli ýaryşlarda).

1/8 finalyň galan 3 duşuşygy şu gije oýnalar. “La Liga” klublarynyň özarasynda bu duşuşyklarda “Real Madrid” “Seltany”, “Atletik Bilboa” “Osasunany”, “Real Sosiedad” bolsa “Raýo Wallekanony” kabul eder.

Çärýek finalyň bijeleri 20-nji ýanwarda çekiler.

ЭТО МОЖЕТ БЫТЬ ИНТЕРЕСНОЕЩЕ ОТ АВТОРА