Halkara Pul Gaznasynyň (HPG) Ýerine ýetiriji direktorlar geňeşi gaznanyň indiki başlygynyň saýlanmagy baradaky prosesiň başlandygyny we apreliň ahyryna çenli tamamlanmagyna garaşylýandygyny mälim etdi.
Gaznanyň häzirki ýolbaşçysy Kristalina Georgiýewanyň 5 ýyllyk wezipe möhleti 30-njy sentýabrda dolýar. Täze direktoryň Gaznanyň ýolbaşçysy ýa-da ýerine ýetiriji direktory tarapyndan dalaşgär görkezilip bilinjekdigi we ozalky ýyllarda bolşy ýaly, biragyzdan saýlanmagynyň maksat edinilýändigi bellenildi.
Georgiýewa geçen hepde gaznada ikinji möhletde hem ýolbaşçy bolmak isleýändigini mälim edipdi. Düýn Ýewropa Bileleşigine agza ýurtlaryň maliýe ministrleri hem Georgiýewanyň ýene bir möhlet gaznanyň ýolbaşçysy bolmagyna goldaw berýändiklerini mälim edipdi.
Adatça, HPG-nyň Direktory Ýewropa ýurtlary, Bütindünýä bankynyň başlygy bolsa ABŞ tarapyndan kesgitlenýär.
