Russiýa üç gün dowam etjek prezident saýlawlary başlady. Bilermenler häzirki prezident Wladimir Putiniň ýeňiş gazanjakdygyny belleýärler. Ýurtda 112 million töweregi saýlawçy bar. Daşary ýurtlarda ýaşaýan rus raýatlarynyň 1,9 millionynyň hem ses bermäge hukugynyň bardygy bellenildi. Saýlawa Wladimir Putinden başga üç dalaşgär gatnaşýar. Olar Liberal-demokratik partiýanyň başlygy Leonid Sluskiý, Kommunist partiýanyň dalaşgäri Nikolaý Haritonow we parlamentiň aşaky palatasy bolan döwlet Dumasynda az sanly goldawçysy bolan hem-de golaýda döredilen Täze adamlar partiýasyndan, işewür Wladislaw Dawankow.
Saýlaw 15-17-nji mart aralygynda adaty hem-de elektron usulda geçirilýär. Saýlaw 80-den gowrak federal sebitde geçirilýär.
Wladimir Putin ilkinji gezek 2000-nji ýylyň mart aýynda geçirilen saýlawda bu wezipä saýlanypdy. 2008-2012-nji ýyllar aralygynda ýurduň hökümet başlygy wezipesini ýerine ýetirdi. Şol döwürdäki Konstitusiýada döwlet ýolbaşçysy yzly-yzyna iki gezekden köp bu wezipäni ýerine ýetirip bilmeýärdi. Ýurtda 2020-nji ýylda Konstitusiýanyň üýtgedilmegi häzirki prezidente 2036-njy ýyla çenli bu wezipäni saklamagyna mümkinçilik berýär. Prezident Putin şol senä çenli bu wezipede oturan ýagdaýynda ýurduň taryhynda iň uzak wagtlap döwlet ýolbaşçysy bolan lider bolar. Bäşinji gezek bu wezipä dalaş edýän Wladimir Putin 2018-nji ýyldaky saýlawda 76,7 göterim ses alypdy.
