Golaýda «Aşgabat» köpugurly stadionda tennis boýunça Aşgabadyň birinjiligi ugrunda ýaryş guraldy. 14 we 18 ýaşdaky tennisçileriň arasynda guralan ýaryşa ýaş türgenleriň 150-si gatnaşdy.
Netijede gyzlaryň arasynda Aşgabadyň ýöriteleşdirilen 42-nji orta mekdebiniň okuwçysy Ilima Guseýnowa ýaş aýratynlyklaryň ikisi boýunça-da ýeňiş gazandy. Kiçi ýaş toparynyň finalynda ol Aşgabatdaky 87-nji orta mekdebiniň 5-nji synp okuwçysy Näzli Hudaýgulyýewadan üstün çykdy, uly toparda bolsa iki setiň dowamynda Türkmenistanyň häzirki çempiony, Aşgabatdaky 50-nji orta mekdebiniň 11-nji synp okuwçysy Aişa Bikbulatowany ýeňdi.
Oglanlaryň arasynda 14 ýaşa çenli toparda Aşgabatdaky 86-njy orta mekdebiň 7-nji synp okuwçysy Süleýman Hudaýberdiýew finalda Nazar Amangeldiýewden üstün çykyp, ýeňiji boldy. 18 ýaşa çenli oglanlaryň arasyndaky ýaryşyň aýgytlaýjy duşuşygynda bolsa Aşgabatdaky 51-nji orta mekdebiň 9-njy synp okuwçysy Resul Mämmetgurbanow Selim Çagylowy utmagy başardy.
Jübütleýin görnüşde geçirilen ýaryşda Aşgabatdaky 18-nji orta mekdebiň 9-njy synp okuwçysy Selim Çagylow we 88-nji orta mekdebiň 11-nji synp okuwçysy Selim Pirjikow Aşgabat şäheriniň birinjiligi ugrundaky ýaryşyň ýeňijileri boldular. Gyzlaryň arasyndaky jübütleýin ýaryşda Aişa Bikbulatowa hem-de Aýnur Möwlamowa hormat münberiniň iň ýokary basgançagyna çykdylar.
