123-nji gezek geçirilen “Fransiýa Açykda” zenanlaryň arasynda polşaly Iga Şwentek ýeňiji bolup, ol 2,4 million ýewro pul baýragy bilen sylaglandy.
Sanawyň 1-nji belgili tennisçisi Iga Şwentek bilen 12-nji basgançakdaky italiýaly Jasmin Paolininiň arasyndaky final duşuşygy 1 sagat 8 minutda tamamlandy. Erjel oýun görkezen polşaly Şwentek garşydaşyny 6:2 we 6:1 hasaplar bilen ýeňlişe sezewar etdi. Bu onuň “Fransiýa Açykdaky” bassyr 3-nji, umumylykda-da 4-nji çempionlygydyr. Ol “Rolan Garrosda” yzly-yzyna 3 çempionlyk gazanan 3-nji zenan tennisçidir (Monika Seleş, Žýustin Enen). “Rolan Garrosda” 21 oýundan bäri ýeňilmän gelýän Şwentek awstraliýaly Kris Ewert (29), amerikaly Monika Seleş (25), fransiýaly Žýustin Enen (24) dagydan soň bu ugurda 4-nji ýerde barýar. Umumylykda 5-nji “Uly tuwalgasyny” gazanan (“Fransiýa Açyk” – 2020, 2022, 2023, 2024, “Amerika Açyk” – 2022) Şwentek russiýaly Mariýa Şarapowa hem-de şweýsariýaly Martina Hingisden öňe geçdi.
“Rolan Garrosda” finala çykan 3-nji italiýaly zenan tennisçi adyny alan Paolini zenanlaryň arasyndaky jübütleýin ýaryşyň finalynda-da watandaşy Sara Errani ikisi amerikaly Koko Gauff hem-de çehiýaly Katerina Sinýakowa ikisinden asgyn geldi.
Ýaryşyň dowamynda çärýek finalda çyksa-da, şikesi sebäpli ýaryşdan çekilen serbiýaly Nowak Jokowiç 2 rekordy täzeledi. Ol 1/8 finalda argentinaly Fransisko Çerunolony 3:2 hasabynda ýeňip, “Uly tuwalgalardaky” 370-nji duşuşygynda ýeňiş gazandy we 59-njy gezek çärýek finala çykdy. Jokowiç bu 2 görkeziji boýunça-da şweýsariýaly Rojer Federeriň rekordyny täzeledi. Jokowiçiň ýaryşdan çekilmeginden soň täze sanawda ýarym finalda Alkarasdan asgyn gelen italiýaly Ýannik Sinner birinji orna beýgeldi.
