Türkmenistanly pälwan Alp Arslan Begenjow erkin göreş boýunça ýaşlaryň arasyndaky (U-20) dünýä çempionatynda ýurdumyzyň taryhynda ilkinji gezek çempion bolmagy başardy. Ildeşimiz bu taryhy üstünligi Ispaniýanyň Pontewedra şäherinde geçirilen dünýä çempionatynda gazandy.
Alp Arslan Begenjow tutuş möwsümiň dowamynda ajaýyp netijeleri görkezdi. Ýylyň başynda Türkiýäniň Antalýa şäherinde geçirilen ýetginjekleriň arasyndaky halkara ýaryşynda bürünç medal gazandy, soňra Iordaniýanyň Amman şäherinde geçirilen Aziýa çempionatynda (U-23) bürünç medala eýelik etdi. Şu ýylyň iýul aýynda Taýlandyň Si-Raçe şäherinde 20 ýaşa çenli türgenleriň arasynda Aziýa çempionatynda altyn medala mynasyp boldy.
