Mundan 152 ýyl ozal, şu günlerde, has takygy, 1872nji ýylyň 30njy noýabrynda futbolyň taryhynda milli ýygyndylaryň arasyndaky ilkinji duşuşyk oýnalýar. FIFA tarapyndan resmi ýagdaýda milli ýygyndylaryň arasyndaky ilkinji duşuşyk diýlip ykrar edilen bu oýunda futbolyň watany Beýik Britaniýanyň 2 wekili – Şotlandiýa bilen Angliýanyň ýygyndylary duşuşýar. Duşuşyk Şotlandiýanyň iri şäheri Glazgonyň çäginde ýerleşýän Patrik şäherçesindäki Günbatar şotland kriket klubunyň meýdançasy bolan «Hamilton Crescent»de geçirilýär. Duşuşyk azrak ýagan garly howada oýnalýar.
Şotlandiýaly William Keýiň jürlewük çalan oýnuna 4 müň janköýer tomaşa edýär. Garamtyl gök eşikde çykyş eden Şotlandiýanyň ýygyndysynyň ähli futbolçysy-da şol wagtlaryň iň meşhur kluby «Kuins Park» toparyndan çagyrylan futbolçylar bolýar. 9 klubdan çagyrylan iňlis futbolçylary ak köýnekçede meýdança çykýar. Başlamaly wagtyndan 20 minut giç başlan duşuşyk golsuz ýagdaýda tamamlanýar. Bu duşuşyk milli ýygyndylaryň arasynda iň köp 2-nji özara duşuşan 2 ýygyndynyň — Angliýa bilen Şotlandiýanyň arasyndaky ilkinji resmi oýun bolýar.
Soňky sapar 2023nji ýylda duşuşan bu 2 ýygyndy şu günki güne çenli 116 gezek gabatlaşýarlar. Şolarda Angliýa 49, Şotlandiýa 41 gezek ýeňiş gazanýar. Iňlisleriň 206 goluna şotlandlar 175 gol bilen jogap berýär. 26 gezek deňme-deň oýnan toparlaryň diňe 4 duşuşygynda hasap açylmaýar. 1-nji hem-de 2-nji golsuz tamamlanan duşuşyklaryň arasyndan 90 ýyl wagt geçýär. Şotlandiýa soňky sapar Angliýany 1999-njy ýylda ýeňýär.
Aslynda 2 topar bu hasaba alnan resmi duşuşyga çenli hem 18701872nji ýyllarda Londonda 5 gezek duşuşykýar. 1870nji ýylyň 5nji martynda (1–1), 19njy noýabrynda (1–0), 1871nji ýylyň 25nji fewralynda (1–1), 18nji noýabrynda (2–1) hemde 1872nji ýylyň 24nji fewralynda geçirilen oýunlarda iňlisler 2 gezek ýeňiş gazanýar. Ýöne Angliýanyň Federasiýasy tarapyndan guralan bu görkezme duşuşyklaryny FIFA resmi taýdan hasaba almaýar.
