“Real Madridi” ýaş ýyldyzlary çärýek finala çykardy

Ispaniýanyň Şa Kubogy ýaryşynda çärýek finala çykan toparlaryň ählisi hem belli boldy. Tapgyryň öňe saýlanýan duşuşygynda “Real Madrid” öz meýdançasynda “Selta” bilen duşuşdy. Çekeleşikli geçen oýunda “Real Madrid” 1-nji ýarymyň ahyrlarynda Mbappeniň (37), 2-nji ýarymyň başynda-da Winisiusyň (48) gollary bilen 2-0 hasabynda öňe saýlandy. Ýöne ruhdan düşmedik “Selta” duşuşygyň soňky 10 minutynda hasaby deňlemegi başardy. 83-nji minutda Bamba aratapawudy 1 gola düşüren bolsa, 90+1-nji minutda Markos Alonso penaltini dürs urup, hasaby deňledi. Goşmaça wagtda “Real” has erjel oýun görkezdi. Esasanam oýna soň giren 2 ýaş futbolçynyň tagallasy madridlilere ýeňiş getirdi. 108-nji minutda Arda Güleriň pasynda topy derwezä gönükdiren Endrik “Realy öňe saýlady. 112-nji minutda Walwerdeniň batly urgusyny myhman toparyň derwezeçisine saklamak başartmady. 119-njy minutda ýene-de Arda Güleriň pasyndan soň Endrik tapawutlanyp, oýna soňky nokady goýdy. Şunlukda, “Real Madrid” goşmaça wagtda “Seltany” 5-2 hasabynda ýeňip, çärýek finala adyny ýazdyrdy.