Türkmenistanyň Beýik Saparmyrat Türkmenbaşy adyndaky Baş akademiki drama teatrynyň zehinli artisti Şemşat Kasymowa ýurdumyzda Mukaddes Garaşsyzlygyň 35 ýyllyk şanly baýramyna bagyşlanyp giň gerimde guralan «Garaşsyzlyk — ganatym, Watanym — seždegähim» atly teatr bäsleşiginde «Zenan keşbini iň oňat ýerine ýetirendigi üçin» atly ýörite baýraga mynasyp boldy.

Türkmenistanyň Medeniýet ministrligi hem-de Türkmenistanyň Magtymguly adyndaky Ýaşlar guramasynyň Merkezi Geňeşi tarapyndan bilelikde guralan hem-de 2026-njy ýylyň 26-njy awgustyndan 8-nji sentýabry aralygynda geçirilen bu döredijilik bäsleşigine ýurdumyzyň ýediden gowrak öňdebaryjy teatrlary gatnaşdy. Halypa režissýorlardan, tejribeli artistlerden we ussat mugallym-professorlardan düzülen eminler topary teatrlaryň görkezen sahna oýunlaryna hünär taýdan berk baha berdiler.

Şemşat Kasymowa bäsleşigiň dowamynda ýerine ýetiren çeper, çuňňur mazmunly we täsirli zenan keşbi arkaly hünärmenleriň hem-de tomaşaçylaryň ünsüni özüne çekmegi başardy. Ol özüniň ussatlygy bilen milli teatr sungatymyza mahsus bolan ynsanperwerlik, watansöýüjilik we milli däp-dessurlarymyza sarpa goýmak ýaly ýörelgeleri sahnada ýerlikli açyp görkezdi.

Berkarar döwletimiziň täze eýýamynyň Galkynyşy döwründe ýurdumyzda medeniýet we sungat işgärleriniň hünär derejesini ýokarlandyrmaga, olary täze döredijilik üstünliklerine höweslendirmäge giň şertler döredilýär. Şemşat Kasymowanyň gazanan bu ýörite baýragy ýaş artistleriň zehininiň ýüze çykmagyna, teatr sahnalarynda döredilýän keşpleriň hiliniň we täsirliliginiň artmagyna möhüm goşant goşdy hem-de giň tomaşaçylar köpçüligi tarapyndan uly buýsanç bilen garşylandy.

Gyzykly bolup bilerЕЩЕ ОТ АВТОРА