Moto GP boýunça dünýä çempionatynda möwsümiň çempiony belli boldy. Ispaniýanyň Walensiýa şäherindäki Ricardo Tormonyň adyny göterýän trassada geçirilen möwsümiň 13-nji ýaryşynda “Petronas Yamaha” toparynyň italýan sürüjisi Franko Morbidelli ýeňiş gazandy. Ol ilkinji hatardan başlan ýaryşynda 27 aýlawy 41 minut 22,478 sekuntda tamamlan Morbidelli möwsümdäki 3-nji gezek ýeňiji boldy. Ondan 0,093 sekunt yza galan “Pramac-Ducati” toparynyň awstraliýaly sürüjisi Jek Miller 2-nji ýeri eýeledi. Ýeňijiden 3 sekunt soň, pellehana gelen “Red Bull KTM” toparynyň ispan sürüjisi Pol Espargaro münberiň 3-nji basgançagyna çykdy. 12-nji hatardan ýaryşa goşulan “Suzuki Ecstar” toparynyň ispaniýaly sürüjisi Žuan Mir bäsleşigi 7-nji orunda tamamlap, karýerasyndaky ilkinji çempionlygyny gazandy. Diňe 1 bäsleşikde ýeňiji bolan Žuan Mir 171 utuk toplap, möwsümiň tamamlanmagyna 1 ýaryş galanda, 2-nji ýerdäki Franko Morbidelliden 29 utuk öňe saýlandy. Şeýlelikde, 23 ýaşly Žuan Mir ilkinji gezek Moto GP-niň çempiony bolmagy başardy. Mir şu möwsümde 3 gezek 2-nji, 3 gezegem 3-nji ýeri eýeledi. Ol 2 ýaryşy tamamlap bilmedi.
Moto GP-de möwsümiň iň soňky, 14-nji bäsleşigi 22-nji noýabrda Portugaliýada geçiriler.
