Ýene-de 2 ýyldan futbol boýunça Katarda geçiriljek XXII Dünýä Kubogynyň saýlama tapgyrynyň Ýewropa zolagynyň bijeleri çekildi. Bijä laýyklykda 55 ýygyndy 10 toparça paýlandy. Toparçalaryň 5-sinde 5, galan 5-sinde hem 6 topar çykyş eder. Dünýä Kubogynyň soňy ýeňijisi Fransiýanyň ýygyndysy “D” toparçada Ukrainadyr Finlýandiýanyň, Bosniýa we Gersegowinanyň hem-de Gazagystanyň milli toparlary bilen duşuşar. Wise-çempion Horwatiýanyň ýygyndysy-da “H” toparça düşüp, olar Slowakiýanyň, Russiýanyň, Sloweniýanyň, Kipriň hem-de Maltanyň ýygyndylary bilen özara güýç synanyşar. Russiýada geçirilen çempionata gatnaşyp bilmän hemmäni geň galdyryp, 50 ýyldan soň Dünýä Kubogynyň daşynda galan Italiýanyň ýygyndysy “C” toparça düşdi. Dünýäniň 4 gezek çempiony italýanlar Şweýsariýanyň, Demirgazyk Irlandiýanyň, Bolgariýanyň hem-de Litwanyň ýygyndylary bilen bije çekişdi.
Toparçadaky duşuşyklar geljek ýylyň mart aýynda başlap, noýabr aýynda-da tamamlanar. Her toparçada 1-nji ýeri eýelän ýygyndylar Katar 2022-de çykyş etmäge hukuk gazanar. Toparçada 2-nji ýeri eýelänler bilen Milletler Ligasyndan goşuljak 2 ýygyndy hem pleý-off tapgyryny geçirerler. Jemi 13 ýygyndy Katarda geçiriljek Dünýä Kubogyna wekilçilik eder. Ýeri gelende aýtsak, Katarda geçiriljek nobatdaky Dünýä Kubogy 2022-nji ýylyň noýabr-dekabr aýlarynda guralar. Çempionat gyş aýlarynda geçiriljek ilkinji Dünýä Kubogy bolar.
“A” TOPARÇA: Portugaliýa, Serbiýa, Irlandiýa, Lýuksemburg, Azerbaýjan
“B” TOPARÇA: Ispaniýa, Şwesiýa, Gresiýa, Gruziýa, Kosowo
“C” TOPARÇA: Italiýa, Şweýsariýa, Demirgazyk Irlandiýa, Bolgariýa, Litwa
“D” TOPARÇA: Fransiýa, Ukraina, Finlýandiýa, Bosniýa we Gersegowina, Gazagystan
“E” TOPARÇA: Belgiýa, Uels, Çehiýa, Belarus, Estoniýa
“F” TOPARÇA: Daniýa, Awstriýa, Şotlandiýa, Ysraýyl, Farer adalary, Moldowa
“G” TOPARÇA: Niderlandlar, Türkiýe, Norwegiýa, Garadag, Latwiýa, Gibraltar
“H” TOPARÇA: Horwatiýa, Slowakiýa, Russiýa, Sloweniýa, Kipr, Malta
“I” TOPARÇA: Angliýa, Polşa, Wengriýa, Albaniýa, Andorra, San Marino
“J” TOPARÇA: Germaniýa, Rumyniýa, Islandiýa, Demirgazyk Makedoniýa, Ermenistan, Lihtenşteýn
