29-njy ýanwarda paýtagtymyzda hormatly Prezidentimiziň başlangyjy bilen Birleşen Milletler Guramasynyň Baş Assambleýasynyň degişli Kararnamasy bilen yglan edilen Halkara parahatçylyk we ynanyşmak ýylynyň başlanmagy mynasybetli dabaraly çäre geçirildi.
Daşary işler ministrliginiň Halkara gatnaşyklary institutynda geçirilen dabara daşary ýurtly diplomatlar, ýurdumyzda işleýän abraýly halkara guramalarynyň wekilhanalarynyň ýolbaşçylary gatnaşdylar.
Şol sanda BMG-niň Türkmenistandaky hemişelik utgaşdyryjysynyň wezipesini wagtlaýyn ýerine ýetiriji, ÝUNISEF-iň ýurdumyzdaky wekili hanym Kristina Weýgand, BMG-niň Baş sekretarynyň Merkezi Aziýa boýunça ýörite wekili, BMG-niň Merkezi Aziýa üçin Öňüni alyş diplomatiýasy boýunça Sebit merkeziniň baştutany hanym Natalýa German, ÝHHG-niň Aşgabatdaky merkeziniň baştutany, ilçi Natalýa Drozd hem-de Mejlisiň deputatlary, ýurdumyzyň ýokary okuw mekdepleriniň rektorlary we daşary ýurtlaryň köpçülikleýin habar beriş serişdeleriniň wekilleri gatnaşdylar.
Maslahatyň çärelerinde wideoaragatnaşyk arkaly BMG-niň, beýleki abraýly sebit hem-de halkara guramalarynyň ýolbaşçylarynyň çykyşlary diňlenildi.
BMG-niň Türkmenistandaky Hemişelik utgaşdyryjysynyň wezipesini wagtlaýyn ýerine ýetiriji, ÝUNISEF-iň wekili Kristina Weýgand dabarany açmak bilen, parahatçylygy, durnuklylygy hem-de halklaryň arasyndaky özara düşünişmegi goldamakda Halkara parahatçylyk ynanyşmak ýylynyň ähmiýetini, onuň durnukly ösüşiň girewidigini belledi.
Ministrler Kabinetiniň Başlygynyň orunbasary, daşary işler ministri türkmen tarapynyň adyndan çykyş edip, şu gün resmi taýdan badalga berilýän uly ähmiýetli syýasy waka – Halkara parahatçylyk we ynanyşmak ýylynyň başlanmagy mynasybetli başlangyja goldaw berendikleri üçin dabara gatnaşyjylara tüýs ýürekden hoşallyk bildirdi. Türkmenistanyň daşary işler ministri ýurtlaryň we halklaryň arasynda dostlukly gatnaşyklaryň ilerledilmeginde özara düşünişmek we hyzmatdaşlyk ýörelgelerine esaslanýan diplomatiýanyň, syýasy gepleşikleriň gurallarynyň netijeli ulanylmagynyň derwaýyslygyny nygtady we munuň üçin Türkmenistanyň halkara hyzmatdaşlary bilen işjeň özara hereketleri saklaýandygyny belledi.
Mälim bolşy ýaly, hormatly Prezidentimiziň 2021-nji ýyly Halkara parahatçylyk we ynanyşmak ýyly diýip yglan etmek baradaky teklibi Birleşen Milletler Guramasynyň Baş Assambleýasy tarapyndan biragyzdan goldanyldy hem-de 2019-njy ýylda degişli Kararnama bilen berkidildi.
Dabaranyň barşynda çykyş eden BMG-niň Baş sekretarynyň Merkezi Aziýa boýunça Ýörite wekili, BMG-niň Merkezi Aziýa üçin öňüni alyş diplomatiýasy boýunça sebit merkeziniň baştutany Natalýa German tutuş dünýä jemgyýetçiliginiň parahatçylygynyň we gülläp ösüşiniň hatyrasyna jebisligiň has hem ýygjamlaşdyrylmagyny maksat edinýän Halkara parahatçylyk we ynanyşmak ýylynyň wajyplygyny aýratyn belledi.
Maslahatyň dowamynda BMG-niň Baş Assambleýasynyň 75-nji sessiýasynyň Başlygy jenap Wolkan Boskyryň, Türkmenistanyň BMG-niň ýanyndaky Hemişelik wekili A.Ataýewanyň, Ykdysady hyzmatdaşlyk guramasynyň Baş sekretary Hadi Soleýmanpuryň, GDA-nyň Ýerine ýetiriji komitetiniň başlygy – Ýerine ýetiriji sekretary Sergeý Lebedewiň, ÝUNESKO-nyň Baş konferensiýasynyň Başlygy jenap Altaý Jengizeriň, BMG-niň Ženewadaky edarasynyň Baş direktory Tatýana Walowaýanyň, ÝUNESKO-nyň Baş direktorynyň Afrika ýurtlary boýunça orunbasary jenap Firmin Eduard Matokonyň, Ýadro synaglaryny ählumumy gadagan etmek barada Şertnamasy guramasynyň Ýerine ýetiriji sekretary jenap Lassina Zerbonyň wideoçykyşlary diňlenildi.
Dabaranyň dowamynda wideoaragatnaşyk arkaly maslahata gatnaşýan beýleki daşary ýurtlylara, şol sanda BMG-niň ýanyndaky dürli döwletleriň wekillerine söz berildi.
Çykyşlarda şu günki şanly waka gatnaşmaga döredilen mümkinçilik üçin tüýs ýürekden hoşallyk bildirildi hem-de Bitarap Türkmenistanyň halkara parahatçylygyny, howpsuzlygyny hem-de durnuklylygyny berkitmek, häzirki döwrüň wajyp meseleleriniň oýlanyşykly çözgütlerini işläp düzmek işinde umumy tagallalary birleşdirmekdäki işjeň orny nygtaldy.
ÝHHG-niň Aşgabatdaky merkeziniň baştutany, ilçi Natalýa Drozduň çykyşynda Owganystanyň parahatçylykly ýol bilen durmuş-ykdysady taýdan täzeden dikeldilmegine Bitarap Türkmenistanyň goşýan goşandyna ýokary baha berildi.
Dabaranyň barşynda Halkara parahatçylyk we ynanyşmak ýylynyň çäklerinde bilelikdäki çäreleri geçirmegiň mümkinçilikleri ara alnyp maslahatlaşyldy, sebit we halkara guramalarynyň binýatlaryndaky işleri giňeltmegi goşmak bilen, ýurtlaryň arasyndaky hyzmatdaşlygy ösdürmek hakynda pikir alşydy. Maslahatyň jemleri boýunça Halkara parahatçylyk we ynanyşmak ýylyny geçirmegiň Ýol kartasy kabul edildi.
